مدارس اسلامی تعلیمات ودھاوݨ دا اہم ذریعہ ہن، وزیرِاعظم شہباز شریف دی اتحادِ تنظیماتِ مدارس دے وفد نال ملاقات اچ ڳالھ مہاڑ

اسلام آباد۔4جنوری(اے پی پی) وزیراعظم محمد شہباز شریف آکھیے جو پورے ملک دے مدارس اسلامی تعلیمات ودھاوݨ دا اہم ذریعہ ہن، حکومت دی خواہش اے جو ایں نیک سماجی خدمت اچ مدارس دا ہتھ ونڈاوے، مدارس پاکستانی اتے اسلامی این جی اوزدا وݙا نیٹ ورک ہن ، مدارس دی تعلیمی اتے سماجی خدمات اچ علمائے کرام دی مشاورت نال ہر ممکن تعاون کریسوں ، مفتی اعظم پاکستان رفیع عثمانی مرحوم دی دین اسلام کیتے خدمات داعالم اسلام معترف اے۔اے ڳالھ انہاں اتحادِ تنظیماتِ مدارس دے وفد نال ڳالھ مہاڑ کریندے ہوئیں آکھی اے جنہاں ٻدھ کوں انہاں دے نال ملاقات کیتی ملاقات اچ صدر جمیعتِ علماءِ اسلام مولانا فضل الرحمن، مولانا مفتی محمد تقی عثمانی، مولانا محمد حنیف جالندھری، مولانا مفتی منیب الرحمن، صاحبزادہ عبدالمصطفی ہزاروی، سینیٹر پروفیسر ساجد میر، مولانا عبدالمالک، مولانا افضل حیدری، مولانا عبدالکبیر آزاد اتے مولانا فضل رحیم اشرفی دے علاوہ ٻئے جید علما دے نال نال وفاقی وزرا رانا تنویر حسین، مریم اورنگزیب، رانا ثنا اللہ خان، مفتی عبدالشکور، معاونِ خصوصی سید فہد حیسن اتے متعلقہ اعلی حکام شرکت کیتی۔ وفد وزیرِ اعظم کوں مدارس کوں پیش آندے مسئلیں بارے ݙسایا ۔ وزیرِ اعظم مدارس دے منتظمین کوں یقین ݙیوائے جو حکومت انہاں مدارس دے انتظام دے حوالے نال انہاں کوں ودھ توں ودھ خودمختاری ݙیوݨ دے نال نال نہ صرف انہاں دے رجسٹریشن دے طریقہ کار کوں مزید سہل بلکہ انہاں مدارس اچ جدید دور دے تقاضیں دے مطابق تعلیم دی فراہمی اچ ہر قسم دی مدد ݙتی ویسی۔ وزیرِاعظم ایں موقع تے آکھیے جو انہاں کیتے جید علما دے وفد نال ملاقات باعثِ مسرت و عزت اے۔ وزیرِ اعظم آکھیے تساں سارے علما دی ملک اچ دینی شعبے دی تعلیم و تدریس کیتے خدمات قابلِ تحسین ہن۔ دینی مدارس اچ ملک دے چالیھ توں پنجاہ لکھ طلبا مفت دینی تعلیم توں فیضیاب تھیندے پئن جنہاں اچ حفظِ قرآن پاک وی کروایا ویندے ۔ وزیرِاعظم مزید آکھیے مدارس ہمیشہ پاکستان دے مفادات دا تحفظ کیتے۔