کنٹرول لائن دے ݙوہیں پاسوں تے پوری دنیا اچ رہݨ آلے کشمیری اڄ یوم حق خود ارادیت منیندے پئن

اسلام آباد۔5جنوری(اے پی پی) کنٹرول لائن دے ݙوہیں پاسوں تے پوری دنیا اچ رہݨ آلے کشمیری اڄ حق خود ارادیت دا ݙینھ منیندے پئن جیں دا مقصد عالمی برادری خاص طور تے اقوام متحدہ تے دٻاؤ پاوݨ اے او کشمیریاں نال کیتے ڳئے آپݨے وعدے کوں پورا کرے ۔ کشمیر میڈیا سروس موجب “یوم حق خود ارادیت“ کل جماعتی حریت کانفرنس دی کال تے منایا ویندا پئے ۔ اے 5جنوری 1949 دا ݙٰینھ ہئی جݙاں اقوام متحدہ دی سلامتی کونسل ھک تاریخی قرارداد منظور کیتی ہئی جیندے اچ آکھیا ڳیا ہئی جو ریاست جموں و کشمیر دے بھارت یا پاکستان نال الحاق دے سوال دا فیصلہ آزادانہ تے غیر جانبدارانہ استصواب رائے دے جمہوری طریقے نال کیتا ویسی ۔اڄ آزاد کشمیر، پاکستان تے دنیا اچ احتجاجی مظاہرے، ریلیاں، سیمینار اتے کانفرنساں سودھے مختلف پروگرامزکرائے ویسن تاں جو اقوام متحدہ تے زور ݙتا ونڄ سڳے جو او کشمیریاں کوں بھارتی ریاستی دہشت گردی توں بچاوݨ کیتے کشمیردے جھیڑے کوں آپݨی متعلقہ قرارداداں تے عملدرآمد کروا تے حل کرے ۔ تصفیہ طلب مسئلہ کشمیر جنوبی ایشیا دے امن کیتے سنگین خطرہ اے۔ اقوام متحدہ دی 5 جنوری 1949 دی قرارداد ایں جھیڑے کوں حل کرݨ دی بنیاد ݙیندی اے لیکن بھارت دا ہٹ دھرمی آلا رویہ گزریل ست ݙھاکیں توں ایں جھیڑے دے حل اچ ھک وݙی رکاوٹ بݨیا ہویا اے ۔ بدقسمتی نال عالمی ادارہ کشمیر بارے آپݨی قرارداداں تے عملدرآمد کراوݨ اچ ناکام رہیا تے ایندا نتیجہ اے جو بھارت دے غیر قانونی زیر تسلط جموں و کشمیر دے عوام مسلسل مصائب و مشکلات دا شکار ہن۔