جدہ ۔22جنوری (اے پی پی):او آئی سی خبر رساں اداریں دی یونین (یو این اے) اسٹاک ہوم اچ قرآن پاک دی بے حرمتی دی شدید الفاظ اچ مذمت کریندے ہوئیں مرتکب لوکاں دے خلاف کارروائی دا مطالبہ کیتے ۔ یو این اے سویڈن دے حکام دی اجازت نال گزریل ݙینھ سڄے ہتھ دے کارکناں دی طرفوں اسٹاک ہوم اچ ترکیہ دے سفارت خانے دے سامݨے قرآن پاک دی بے حرمتی دے گھناؤنے فعل دی سخت الفاظ اچ مذمت کریندے ہوئیں سویڈش حکام تے زور ݙتے جو او ایں نفرت کھنڈاوݨ دے جرم دے مرتکب لوکاں دے خلاف ضروری اقدامات کرن ۔ یو این اے دی طرفوں جاری بیان موجب یو این اے چتاوݨی ݙتی اے جو ایجھی اشتعال انگیز کارروائی، جیں کوں نفرت انگیز جرم سمجھیا ویندے سڄے ہتھ دے انتہا پسنداں دی طرفوں ول ول ایندا ارتکاب کیتا ویندا پئے ، مسلماناں کوں نشانہ بݨاوݨ تے انہاں دی مقدس اقدار دی توہین دی حامل اے اتے اسلامو فوبیا، نفرت، عدم برداشت اتے زینوفوبیا دےخطرناک حد تئیں پڄݨ دی مزید مثال دے طور تے بروئے کار آندی اے ۔ یو این اے سویڈش حکام تے زور پاتے جو او ایں نفرت انگیز جرم دے مرتکب لوکاں دے خلاف ضروری اقدامات کرن تے مطالبہ کیتے جو ایں طرح دیاں کارروائیاں ول تھیوݨ توں روکݨ تے اسلامو فوبیا نال نبݨݨ اچ یکجہتی کیتے بین الاقوامی کوششاں کوں ودھایا ونڄے۔
