کشمیریاں دی جدوجہدآزادی ھک ݙینھ ضرور رنگ گھن آسی ، انہاں کوں وی آزادی دا سجھ ݙیکھݨ نصیب تھیسی،گورنرپنجاب

لاہور۔5فروری(اے پی پی):گورنر پنجاب محمد بلیغ الرحمن الحمرا آرٹ کونسل لاہور اچ محکمہ اطلاعات پنجاب دے زیر اہتمام یوم یکجہتی کشمیر دے حوالے نال منعقدہ تقریب توں خطاب کریندے ہوئیں آکھیے کشمیریاں دی جدوجہد تے آزادی کیتے ݙتیاں ڳیاں بے مثال قربانیاں انشااللہ ھک ݙینھ ضرور رنگ گھن آسن تے انہاں کوں وی آزادی دا سجھ ݙیکھݨ نصیب تھیسی ۔ کشمیری بھیݨ بھرواں نال اڄ اظہار یکجہتی دے نال نال اساکوں پشاور اچ تھیوݨ آلے اڄوکے واقعہ وی ٻہوں ݙکھی کرݙتے ۔ گورنر پنجاب آکھیے 5فروری اساں کیتے ھک اہم ݙینھ اے ایں ݙینھ توں نہ صرف ساݙی جذباتی وابستگی اے بلکہ اے ساݙا فرض اے جو اساں مظلومدے رلے کھڑوں ، انسانیت نال کھڑوں تے حق نال کھڑوں۔ انہاں آکھیے ملک دے ترائے واری منتخب وزیراعظم محمد نواز شریف 2013 توں 2017تئیں ہر فورم تے کشمیریاں دے حق اچ آواز چاتی ، بھارت اچ کشمیری بھراویں تے ظلم و ستم دی ھک لمبی اتے انتہائی دردناک تاریخ اے جیں کوں ساݙے غیرت مند کشمیری بھیݨ بھراواں گزریل کئی ݙھاکیں توں بہاردی تے جرات نال برداشت کریندے پئن ۔ بدقسمتی نال اقوام متحدہ اتے انسانی حقوق دی عالمی تنظیماں کشمیراچ آزادانہ تے منصفانہ استصواب رائے دی اقوام متحدہ دے کمیشن ہندوستان اتے پاکستان دی 5جنوری 1949اچ پاس تھیوݨ آلی قرارداد تے عملدرآمد کراوݨ اچ ناکام رہین ۔