بلوچستان دے علاقے بارکھان اچ موٹرسائیکل تے لڳے بم دا دھماکہ، 4 ڄݨے مر ڳن، 12 زخمی

کوئٹہ۔26فروری(اے پی پی)بلوچستان دے علاقے بارکھان اچ موٹرسائیکل تے لائے ڳئے بم دا دھماکا تھئے جیندے اچ 4 ڄݨے مر ڳن اتے ٻالاں سودھا 12 ڄݨے زخمی ہین۔ رکنی بازار اچ اے بمد دا شدید دھماکا ہوٹل دے سامݨے رش ویلھے تھئے۔ دھماکے دا پتا لڳدے ہی پولیس اتے ٻئے قانون نافذ کرݨ آلے اداریاں دے اہلکار پڄین اتے زخمیوں و لاشاں کوں ہسپتال پچائے۔ دھماکے نال نیڑے دیاں دکاناں، موٹرسائیکلاں اتے ریڑھیاں دا وی نقصان تھئے۔ پولیس دے مطابق دھماکے پاروں 3 ڄݨے موقع تے موئن ڄݙاں جو ہک ہسپتال ویندے فوت تھئے۔ دھماکے اچ ݙو ٻالڑیاں سودھا 12 لوک زخمی ہین جیندے اچ 5 دی حالت چنتے آلی اے جنہاں کوں فوری علاج کیتے ڈیرہ غازی خان بھیج ݙتا ڳئے۔ ݙسایا ڳعے جو دھماکا موٹرسائیکل اچ لڳے ریموت کنٹرول ٻم نال کیتا ڳئے۔ سکیورٹی فورسز علاقے کوں ڳھیر تے شواہد کھٹے کر تے تفتیش شروع کر ݙتی اے۔