اٹے دی مفت ونڈ اچ کوئی وسلائی برداشت نہ کیتی ویسی ، وزیراعظم محمد شہباز شریف دی سرگودھا اچ مفت اٹا ونڈݨ دے مرکز دے تے ڳالھ مہاڑ

اسلام آباد۔25مارچ(اے پی پی) وزیراعظم محمد شہبازشریف آکھیے اٹے دی مفت ونڈ اچ کہیں قسم دی کوئی وسلائی برداشت نہ کیتی ویسی ، مفت اٹا مرکز اچ بے نظیر انکم سپورٹ پروگرام اتے نادرا کائونٹرز کوں یقینی بݨایا ونڄے۔ ہفتے کوں وزیر اعظم کمپنی باغ سرگودھا اچ مفت اٹا تقسیم مرکز دا دورہ کیتے۔وزیر اعظم اٹا تقسیم دے طریقے کار دا جائزہ ڳھدا ۔کمشنر سرگردھا وزیراعظم کوں مفت اٹے دی ونڈ دے حوالے نال بریفنگ ݙتی ،وزیر اعظم اٹا تقسیم دے طریقے کار کوں مزید بہتر بݨاوݨ دی ہدایت کیتی ۔ وزیراعظم عوام دی سوکھ کیتے اٹا تقسیم دے مراکز وی ودھاوݨ دا حکم ݙتا ۔ انہاں آکھیے ایں سکیم اچ انتظامیہ نال تعاون کرے،مسئلیں وختی حل تھی ویسن ۔وزیر اعظم ڈپٹی کمشنر کوں ہدایت کیتی جو ھک چنڳی کاوش اے اتنیاں لمبیاں لائناں لڳیاں ہوئیاں ہن ، روزہ داریں کوں سہولت ملݨی چاہیدی اے ، انہاں سرگودھا دے ترائے مراکز دا دورہ کیتے ،نگران وزیر اعلی پنجاب اتے انہاں دی ٹیم چنڳے طریقے نال اے کم کریندی پئی اے ،مفت اٹے دی ونڈ اچ اوکھ اے ایندا پتہ اے تے کتھائیں عملہ گھٹ اے ایں مسئلے کوں حل کریسوں ایں تے اجلاس تھیسی ، غریب آدمی کوں ایں مہانگ دے دور اچ مفت اٹا ݙیوݨ قابل تحسین اقدام اے،اے خدمت نی عبادت اے،انہاں مستحقین دی دعاواں توں ملک پاکستان ضرور اڳوں ودھسی ۔ مشکلات حل کریندے پیوں ،افطار دے بعد اجلاس تھیسی ایندے اچ لمبیاں لائناں تے شناختی کارڈ گھن آوݨ دے اٹا نہ ملݨ جیہے مسئلیں دا جائزہ گھنسوں ، وزیراعلی پنجاب،چیف سیکرٹری پنجاب اتے انتظامیہ کوں مبارخ ݙیندوں انہاں دی محنت نال کم کرݨ تے شاباش ݙیندوں ایہو دین اتے دنیا کماوݨ دا ذریعہ اے۔وزیر اعظم شہباز شریف ایں موقع تے شہریاں نال براہ راست انہاں دی شکایات سݨیان تے مستحق شہریاں اچ آپݨے ہتھاں نال اٹا ونڈیا ۔ ایں مفت اٹا سکیم دے تحت غریب شہریاں کوں فی خاندان اٹے دے ترائے تھیلے مفت ݙتے ویندے پئن ، وزیراعظم اٹے دی مفت فراہمی دیاں سہولتاں تے اٹے دا معیار چیک کیتا۔وزیر اعظم اٹے دی مفت ونڈ دے دوران بدنظمی دی شکایات تے خود دورے شروع کیتن ۔