معیشت دی بہتری کیتے آئی ایم ایف نال معاملات وختی طے تھی ویسن ، وزیرخزانہ اسحاق ڈاردا افطارڈنرتوں خطاب

اسلام آباد۔26مارچ(اے پی پی) وفاقی وزیرخزانہ ومحصولات سینیٹرمحمداسحاق ڈارآکھیے معیشت دی بہتری کیتے آئی ایم ایف نال معاملات وختی طے تھی ویسن ، پاکستان دیوالیہ نہ تھیسی ۔ انہاں اے ڳالھ اسلام آباد چیمبر آف کامرس دی طرفوں غیر ملکی سفرا دے اعزاز اچ افطار ڈنر اچ مہمان خصوصی دے طورتے آپݨے خطاب اچ آکھی اے ۔ وزیرخزانہ آکھیے دوست ملکاں دی طرفوں پاکستان دے نال تعاون دے بعد آئی ایم ایف نال وختی معاملات طے تھی ویسن جیں توں موجودہ مشکلات تے قابو پاوݨ اچ مدد ملسی تے معیشت بحالی دے پاسے ٹرسی ، انہاں آکھیے 2016 اچ پاکستان دنیا دی 24ویں وݙی معیشت ہئی تے اساں جی 20 اچ رلݨ دا سوچیندے پئے ہاسے لیکن ایں ویلھے ساݙی معیشت کوں سنگین معاشی چیلنجز دا سامݨا اے۔ انہاں آکھیے پاکستان دیوالیہ نہ تھیسی تے حکومت معیشت کوں پائیدار ترقی دے رستے ٹورݨ کیتے ہر ممکن کوشش کریندی پئی اے ، انہاں سفیراں دے اعزاز اچ افطار ڈنر دا اہتمام کرݨ تے آئی سی سی آئی دے اقدام دی تعریف کیتی ۔ اسلام آباد چیمبر آف کامرس اینڈ انڈسٹری دے صدر احسن ظفر بختاوری آکھیے کاروبار اتے سرمایہ کاری دے بہتر ودھارے کیتے اقتصادی پالیسیاں دا تسلسل ضروری اے، امید اے حکومت ایں پاسے خصوصی توجہ ݙٰیسی۔