وزیراعظم شہبازشریف صدر عارف علوی کوں پنج ورڳیں تے ست نکتیں تے مشتمل جوابی خط لکھ ݙتا،خط انہاں دے منصب دا آئینہ دار کائنی بلکہ تحریک انصاف دی ھک پریس ریلیزݙکھائی ݙیندے ، جوابی خط

اسلام آباد۔26مارچ(اے پی پی) وزیراعظم شہبازشریف صدر عارف علوی کوں پنج ورقیں تے ست نکتیں تے مشتمل جوابی خط لکھ ݙتے ، جیں اچ آکھیا ڳئے جو صدر دی طرفوں لکھیا ڳیا خط انہاں دے منصب دا آئینہ دار کائںی بلکہ تحریک انصاف دی ھک پریس ریلیز لڳدے ،صدر آئین دے آرٹیکل 48 دی شق 1 دے تحت کابینہ یا وزیراعظم دی ایڈوائس دے مطابق کم کرݨ دا پابند اے،وفاقی حکومت دے انتظامی اختیار کوں استعمال کرݨ اچ وزیراعظم صدر دی مشاورت دا پابند کائنی ،میں اتے وفاقی حکومت آئین دے تحت اپݨی ذمہ واریاں توں پوری طرح آگاہ ہیسے ،آئین دی مکمل پاسداری، پاسبانی اتے دفاع دے عہد تے کاربند ہیسے،آئین اچ درج ہر شہری دے بنیادی انسانی حقوق دے تحفظ تے کاربند ہیسے،حکومت پرعزم ہے جو کہیں کوں وی قانون ہتھ اچ گھنݨ ، ریاست پاکستان کوں ناقابل تلافی ضیان پڄاوݨ دی اجازت نہ ݙتی ونڄے ،آئینی طورتے منتخب حکومت کوں کمزور کرݨ دی ہر کوشش ناکام بݨیسوں ۔وزیر اعظم آفس دے میڈیا ونگ توں جاری اعلامیہ موجب صدر عارف علوی وزیراعظم شہبازشریف کوں 24 مارچ کوں خط لکھیا ہئی ۔جوابی خط اچ وزیر اعظم صدر علوی کوں لکھیے جو میں اے آکھݨ تے مجبور ہاں جو آپ دا خط تحریک انصاف دا پریس ریلیز ݙکھائی ݙیندے ،آپ دا خط یک طرفہ، حکومت مخالف خیالات دا حامل اے جنہاں دا تساں کھلم کھلا اظہار کریندو ،آپ دا خط صدر دے آئینی منصب دا آئینہ دار کائنی ، آپ مسلسل ایہو کریندے پیو ۔ وزیر اعظم لکھیے 3 اپریل 2022 کوں آپ قومی اسمبلی دی تحلیل کرتے سابق وزیراعظم دی غیرآئینی ہدایت تے عمل کیتا،قومی اسمبلی دی تحلیل دے آپ دے حکم کوں سپریم کورٹ 7 اپریل کوں غیرآئینی قرار ݙتا،آرٹیکل 91 شق5دے تحت بطور وزیراعظم میݙے حلف دے معاملے اچ وی آپ آئینی فرض نبھاوݨ اچ ناکام تھئے۔انہاں لکھیے کئی مواقع تے آپ منتخب آئینی حکومت دے خلاف فعال انداز اچ کام کریندے آندو،میں آپ دے نال چنڳاں ورکنگ ریلیشن شپ قائم کرݨ دی پوری کوشش کیتی۔وزیر اعظم لکھیے اپݨے خط اچ آپ جیڑھا لب ولہجہ استعمال کیتے، اُوں تے تساکوں جواب ݙیوݨ تے مجبور ہاں ،انسانی حقوق دیاں خلاف ورزیاں دا آپ دا حوالہ ھک جماعت دے سیاستداناں تے کارکناں دے حوالے توں اے ،آئین دے آرٹیکل 10 اے اتے 4 دے تحت آئین اتے قانون دا مطلوبہ تحفظ انہاں سارے لوکاں کوں ݙتا ڳئے ،قانون نافذ کرݨ آلے اداریں ریاستی عمل داری کیتے قانون اتے امن عامہ دے نفاذ دے مطلوبہ ضابطیں تے سختی نال عمل کیتے ، سارے لوکاں قانون دے مطابق داد رشی دے مطلوبہ فورمزنال رجوع کیتے ۔وزیر اعظم لکھیے جماعتی وابستگی پاروں آپ قانون نافذ کرݨ آلے اداریں تے حملیں کوں یکسر فراموش کرݙتا،آپ نجی وسرکاری املاک دی بھن تروڑ ، افراتفری کھنڈاوݨ دیاں کوششاں کوں نظر انداز کرݙتا ، پی ٹی آئی دی ملک کوں معاشی ڈیفالٹ دے کنارے گھن آوݨ دیاں کوششاں کوں آپ نظرانداز کرݙتا۔ وفاقی حکومت دے انتظامی اختیار استعمال کرݨ اچ وزیراعظم صدر دی مشاورت دا پابند کائنی ۔وزیر اعظم لکھیے جناب صدر، میں اتے وفاقی حکومت آئین دے تحت اپݨی ذمہ واریاں توں پوری طرح آگاہ ہیسے ،آئین دی مکمل پاسداری، پاسبانی اتے دفاع دے عہد تے کاربند ہیسے،آئین اچ درج ہر شہری دے بنیادی انسانی حقوق دے تحفظ تے کاربند ہیسے،حکومت پرعزم اے جو کہی کوں وی قانون ہتھ اچ گھنݨ ، ریاست پاکستان کوں ناقابل تلافی ضیان پڄاوݨ دی اجازت نہ ݙتی ونڄے ،آپ کوں یقین ݙوینداں جو آئینی طورتے منتخب حکومت کوں کمزور کرݨ دی ہرکوشش ناکام بݨیسوں ۔