پنجاب حکومت دا دل دے مریضاں کیتے “ڈرپ اینڈ شفٹ” منصوبہ شروع کرݨ دا فیصلہ

لاہور۔4اپریل(اے پی پی)پنجاب حکومت دل دے مریضاں کیتے”ڈرپ اینڈ شفٹ“شروع کرݨ دا فیصلہ کیتے، ہارٹ اٹیک تے مریض کوں ضروری انجکشن لا تے ایمبولینس اچ تحصیل و ڈسٹرکٹ ہسپتال ٻھیڄیا ویسی۔ اے فیصلہ لاہور اچ نگران وزیراعلیٰ پنجاب محسن نقوی دی اڳواݨی اچ تھئے جئیں پرائمری انجیو گرافی سانڳے اڳونہی دا جائزہ ڳھدے۔ “ڈرپ اینڈ شفٹ” ابتدائی طور تے پنجاب دے 4 اضلاع شیخوپورہ، قصور، چنیوٹ اتے جھنگ اچ شروع کیتا ویسی اتے تحصیل و ڈسٹرکٹ ہسپتالاں اچ پرائمری انجیو گرافی دی سہولت نہ ہووݨ تے مریض کوں نیڑے دے ہسپتال پچایا ویسی، ایں سانڳے ریسکیو 1122 دی خصوصی ایمبولینس اچ ٹرینڈ سٹاف اتے ضروری طبی آلات ہوسن۔ سیکرٹری سپیشلائزڈ ہیلتھ اینڈ میڈیکل ایجوکیشن بریفنگ ݙتی جو پنجاب دے 9 وݙے ہسپتالاں اچ ݙھائی ہزار توں ودھ مریضاں کوں پرائمری انجیو گرافی دی سہولت ݙتی ڳئی اے جیندے نال دل دے سیکڑاں مریضاں دی جان بچاوݨ ممکن تھئے۔ اجلاس اچ صوبائی وزیر سپیشلائزڈ ہیلتھ کیئر اینڈ میڈیکل ایجوکیشن ڈاکٹر جاوید اکرم، ڈاکٹر فرقد عالمگیر، سیکرٹری سپیشلائزڈ ہیلتھ اینڈ میڈیکل ایجوکیشن، چیئرمین پنجاب انفارمیشن ٹیکنالوجی بورڈ، ڈی جی ریسکیو 1122 ڈاکٹر رضوان نصیر اتے ٻئے متعلقہ حکام شرکت کیتی۔