دہشتگردی دے خلاف پورے عزم نال لڑݨ دی لوڑھ اے، رابطہ کاری ودھا تے معاشی استحکام ممکن تھی سڳدے، وزیراعظم شہباز شریف دا ایس سی او سر براہی اجلاس نال خطاب

اسلام آباد۔4جولائی(اے پی پی)وزیراعظم محمد شہباز شریف آکھیے جو خطے اچ پائیدار امن شنگھائی تعاون  تنظیم(ایس سی او) دے رکن  ممالک دی ذمہ داری اے، ریاستی دہشت گردی سودھا ہر قسم دی دہشت گردی نال پورے عزم نال رل مل تے لڑݨا ہوسی، رابطہ کاری ودھا تے ہی معاشی استحکام دا مقصد پورا کیتا ونڄ سڳدے، سی پیک معاشی خوشحالی، امن و استحکام اچ گیم چینجر ثابت تھیس، ترقی یافتہ ممالک ماحولیاتی تبدیلیاں دے نقصانات نال نمٹݨ کیتے ترقی پذیر ممالک دا ہتھ ونݙاون، پاکستان ایں سال دے مکݨ تے مواصلات بارے ایس سی او اجلاس دی میزبانی کریسی۔ اے ڳالھیں انہاں شنگھائی تعاون تنظیم دے 23ویں سربراہی اجلاس نال خطاب اچ آکھی۔ تنظیم دا آن لائن اجلاس بھارت دی میزبانی اچ تھئے جیندے اچ شنگھائی تعاون تنظیم دے رکن ممالک دے سربراہان ویڈیولنک شرکت کیتی۔ وزیراعظم اجلاس اچ قزاخستان کوں رکنیت ملݨ اتے ایرانی صدر ابراہیم رئیسی کوں وی تنظیم دا مکمل رکن ٻݨݨ تے مبارک ݙتی۔ انہاں بیلا روس کوں تنظیم دے آندے  اجلاس اچ مکمل رکنیت ݙیوݨ دے فیصلے دا خیرمقد م کیتے۔ وزیراعظم آکھیا جو اڄ ڄڳ کوں معاشی و سلامتی چیلنجز دا سامݨا اے، شنگھائی تعاون تنظیم کوں امن ، استحکام ، سلامتی و ترقی کیتے کردار ادا کرݨا چاہیدے، رابطہ کاری کیتے سرمایہ کاری، ٹرانسپورٹ کوریڈورز ٻݨا تے معاشی استحکام ڳھدا ونڄ سڳدے۔ وزیراعظم آکھیے جو دہشت گردی دے معاملے تے ڈپلومیٹک پوائنٹ سکورنگ نئیں تھیوݨی چاہیدی، ساکوں ریاستی دہشتگردی سودھا ہر قسم دی دہشتگردی دی مذمت کرݨی ہوسی، سیاسی ایجنڈے دے تحت مذہبی اقلیتاں کوں نشانہ ٻݨاوݨ دی وی مذمت ہوݨی چاہیدی اے۔ وزیراعظم آکھیا جو عالمی مسائل دے حل کیتے عالمی یکجہتی دی لوڑھ اے، ماحولیاتی تبدیلی ہک وݙا مسلہ اے، ایں سانڳے سانڄھے اقدامات کرݨے ہوسن، توانائی اتے غذائی اشیاء دیاں قیمتاں ودھݨ اتے ودھدی غربت وݙے مسائل ہین جیندے حل کیتے عالمی برادری کوں ہک تھیوݨا ہوسی۔