حکومت وزیراعظم شہباز شریف دے وژن دے مطابق سی پیک منصوبیں کوں اڳوں گھن تے چلدی پئی اے ، ہݨ تئیں 29ارب ڈالر دے منصوبے مکمل کیتے ڳئن، احسن اقبال

اسلام آباد۔5جولائی(اے پی پی) وفاقی وزیر منصوبہ بندی ترقی و خصوصی اقدامات پروفیسر احسن اقبال آکھیے اڄ دا ݙینھ انہاں کیتے ٻہوں خوشی دا ݙینھ اے جو سفر 2013 اچ شروع تھیا ہئی تے ایندے 10 سال اڄ مکمل تھئن جیں اچ ٻہوں سارے نشیب وفراز آئے لیکن حکومت وزیراعظم شہباز شریف دے وژن دے مطابق سی پیک منصوبیں کوں اڳوں گھن تے ٹردی پئی اے ، اے ڳالھ انہاں ٻدھ کوں اتھاں سی پیک دی مفاہمتی یاداشت  دا ھک ݙھاکا مکمل تھیوݨ تے موقع تے منعقدہ تقریب توں خطاب کریندے ہوئیں آکھی اے ۔وفاقی وزیر آکھیے 10سال پہلے 5جولائی 2013 کوں سابق وزیراعظم نواز شریف اتے صدر شی جن پنگ چین اچ ھک میمورنڈم آف انڈرسٹینڈنگ تے دستخط کیتے ہن ایں اچ چین پاکستان اقتصادی راہداری منصوبے( سی پیک ) جیڑھا جو بی آر آئی دا ھک فلیگ شپ منصوبہ اے ، شروع کرݨ دا فیصلہ کیتا ہئی ۔ انہاں آکھیے ایں ویلھے حکومت پورے ملک اچ ایں حوالے نال ساریاں سیاسی جماعتاں، مختلف مکاتب فکر دے لوکاں نال ایں تے ڳالھ مہاڑ کیتی ہئی تے ساریں دا متفقہ فیصلہ ہئی جو ایں منصوبے کوں وختی شروع کیتا ونڄے ، انہاں آکھیے سابق وزیراعظم نواز شریف دا وژن ہئی جو پاکستان کوں ایشین ٹائیگر بݨیسوں تے ایں ویلھے حکومت ایں منصوبے نال وژن 2025  شروع کیتا، اے انہاں ݙوہیں منصوبیں دا ملاپ اے ۔