طوفانی مینھ دی صورت اچ ضلعی انتظامیہ، ریسکیو 1122، پی ڈی ایم اے ، میونسپل اتے متعلقہ اداریں دے اشتراک عمل کوں یقینی بݨایا ونڄے، وزیر اعظم شہباز شریف دی ہدایت

اسلام آباد۔5جولائی(اے پی پی):وزیراعظم شہبازشریف پنجاب حکومت کوں طوفانی مینھ دے وختی بعد اقدامات دی ہدایت کریندے ہوئیں آکھیے ضلعی انتظامیہ، ریسکیو 1122، پی ڈی ایم اے ، میونسپل اتے متعلقہ اداریں دے اشتراک نال ضروری اقدامات کیتے ویسن ، ٻدھ کوں وزیراعظم آفس دے میڈیا ونگ توں جاری بیان موجب وزیراعظم شہبازشریف  وزیراعلی پنجاب کوں امدادی ٹیماں کوں وختی متحرک کرݨ دی ہدایت کیتی ۔ انہاں حکم ݙتے جو ضلعی انتظامیہ، ریسکیو 1122، پی ڈی ایم اے ، میونسپل اتے متعلقہ اداریں دے اشتراک عمل کوں یقینی بݨایا ونڄے، شہریاں دے جان ومال دے تحفظ کیتے سارے اقدامات کیتے ونڄن ۔ انہاں ضرورت پوݨ تے این ڈی ایم اے اتے وفاقی اداریں کوں پنجاب حکومت کوں بھرپور معاونت دی ہدایت کیتی ۔وزیراعظم ہدایت کیتی جو شہریاں کوں خبردار کرݨ، ٹریفک دے متبادل انتظامات اتے نکاسی آب کیتے ضروری اقدامات یقینی بݨاون ۔وزیراعظم  ملک دے ٻئے حصیں اچ وی ساوݨ دے مینھ اچ پیشگی حفاظتی انتظامات کرݨ دی ہدایت کیتی ، انہاں آکھیے این ڈی ایم اے پی ڈی ایم ایز صوبائی اتے ضلعی انتظامیہ دے اشتراک عمل نال پیشگی انتظامات اچ معاونت کرن ۔دیہاتی علاقیں اچ شہریاں دی وختی محفوظ جاہ تے منتقلی، مال مویشیاں کوں بچاوݨ کیتے اقدامات کیتے ونڄن ۔ وزیراعظم اربن فلڈنگ توں بچاوݨ کیتے فوری اتے ضروری اقدامات تکھے کرݨ دی وی ہدایت کیتی ۔وزیراعظم گلگت بلتستان، آزاد کشمیر، خیبرپختونخوا سودھے سارے پہاڑی علاقیں اچ  انتظامیہ کوں متحرک کرݨ تے سارے اقدامات توں وزیراعظم آفس کوں مطلع رکھݨ دی وی ہدایت کیتی ۔