قرآن پاک دی بے حرمتی تے او آئی سی گروپ دی طرفوں پاکستان دی درخواست تے اقوام متحدہ دی ہیومن رائٹس کونسل اچ بحث 11 جولائی کوں تھیسی

جنیوا۔6جولائی(اے پی پی) قرآن پاک دی بے حرمتی تے او آئی سی گروپ دی طرفوں پاکستان دی درخواست تے اقوام متحدہ دی ہیومن رائٹس کونسل اچ بحث 11 جولائی کوں تھیسی ۔ او آئی سی دی طرفوں جاری ٹویٹ اچ آکھیا ڳئے جو ہیومن رائٹس کونسل قرآن پاک دی بے حرمتی تے وختی بحث کرݨ دا فیصلہ کیتے ۔ او آئی سی دی طرفوں ایں حوالے نال بیان جنیوا اچ پاکستان دے مستقل نمائندے سفیر خلیل ہاشمی جاری کیتے جیں اچ انہاں ہیومن رائٹس کونسل دے 53 ویں اجلاس دے صدر توں کجھ یورپی اتے ٻئے ملکاں اچ قرآن پاک دی ول ول بے حرمتی سودھے مذہبی منافرت دے عوامی سطح تے تھیوݨ آلے خطرناک اقدامات تے غور اینکوں روکݨ کیتے فوری بحث دے انعقاد دا مطالبہ کیتے۔ انہاں آکھیے ہیومن رائٹس کونسل دے موجودہ صدر کوں ایں بارے 3 جولائی کوں ھک خط بھیجا ڳیا ہئی جیں اچ فوری بحث دا مقصد بیان کیتا ڳئے جو اساں ایں تے ناپاک جسارت تے بامعنی بحث کیوں چاہندوں ۔ انہاں آکھیے گزریل ہفتے عید دے ݙینھ تے ھک میست دے ٻاہروں قرآن پاک کوں ساڑ ݙیوݨ تے بے حرمتی کرݨ ھک انڄ عمل کائناں ہئی ، اڄوکے مہینے اچ اے چھیواں موقع ہئی جو مذہبی منافرت دا واضح، ودھدا ہویا مسلسل عمل دی مکمل عکاسی اتے حکومتی لائسنس دے تحت نمائندگی کریندے ۔ انہاں آکھیے اے سارے اسلامو فوبک کارروائیاں پہلے کیتیاں ڳئن تے ول اساں ݙٹھے جو انہاں کارروائیاں کوں اظہار رائے دی آزادی دے حق نال رل تے انہاں دا مستقل دفاع کیتا ڳئے ۔ انہاں آکھیے امن عامہ کیتے ݙو رس اثرات ، انہاں دی جارحانہ تے اشتعال انگیز نوعیت دے باوجود انہاں اچوں کہیں وی کاروائی کوں نہ تاں روکیا ڳئے تے نہ ہی انہاں دے خلاف کاروائی کیتی ڳئی اے ۔ خلیل ہاشمی آکھیے او آئی سی گروپ پہلے اتے ول ول ہیومن رائٹس کونسل اچ امتیازی سلوک، اشتعال انگیزی اتے تشدد کوں بھڑکاوݨ دی انہاں کارروائیاں تے اپݨا  شدید احتجاج  ریکارڈ کرائے تے انہاں دی موثر روک تھام کیتے اقدامات تے زور ݙتے ۔اے امر قابل ذکر اے جو عید الاضحی 1444ھ دے پہلے ݙینھ سویڈن دے دارالحکومت اسٹاک ہوم دی مرکزی مسیت دے ٻاہر قرآن کریم کوں نذرآتش کیتا ڳئے ۔ قرآن کریم دے نسخے کوں نذر آتش کرݨ دے واقعے تے پاکستان اتے سعودی عرب سودھے اسلامی تعاون تنظیم دے رکن ملکاں شدید ردعمل ݙتے ۔ او آئی سی اظہار رائے دی آزادی دے بہانے قرآن کریم اتے ٻئے اسلامی مقدس اقدار اتے علامات دے تقدس کوں مجروح کرݨ دی ساریاں کوششاں کوں مسترد کریندے ہوئیں انہاں کوں انتہاپسندی دے ایجنڈے دی تکمیل قرارݙیندے ہوئیں ہیومن رائٹس کونسل اتےعالمی برادری توں انہاں اشتعال انگیز کاوشاں کوں روکݨ دا مطالبہ کیتے ۔