ملک کوں ترقی دے رستے ٹورݨ کیتے سیاسی قیادت تے اداریں کوں رل تے کم کرݨا ہوسی ،یقین اے پاکستان  وختی ترقی یافتہ ملکاں دی صف اچ رل ویسی ، وزیراعظم  شہباز شریف

تورغر۔6جولائی(اے پی پی):وزیراعظم محمد شہبازشریف آکھیے جیڑھا ویلھا لنگھ ڳئے ایں تے ماتم کرݨ دے بجائے ملک کوں ترقی دے رستے ٹورݨ کیتے سیاسی قیادت  تےاداریں کوں رل تے کم کرݨا ہوسی ، ترقی دا جیڑھا سفر  2013 توں شروع تھی تے 2017 اچ مک ڳیا ہئی اینکوں ول بحال کرݨا اے ۔ اے ڳالھ انہاں تورغر ۔بونیر شاہراہ،بونیر۔ کڑاکڑ رابطہ سرنگ اتے تورغر بونیر آر۔سی۔سی پُل دا سنگ بنیاد رکھݨ توں بعد قبائلی عمائدین اتے مشران  توں خطاب کرئیں آکھی اے ۔ایں  موقع تے وفاقی وزیر اطلاعات و نشریات مریم اورنگزیب ، وزیراعظم دے مشیر انجینئر امیر مقام ،مسلم لیگ (ن ) دے رہنما کیپٹن (ر) محمد صفدر  توں علاوہ  علاقے دےعمائدین اتے مشران دی وݙی تعداد موجود ہئی ۔وزیر اعظم علاقے اچ دانش سکول، ݙو کالجاں دے قیام  تے کالا ڈھاکہ اچ بجلی ݙیوݨ دے منصوبے دا اعلان کیتا۔ وزیراعظم تور غر دے عوام دے آبائو اجداد دی قیام  پاکستان اتے تربیلا ڈیم کیتے آپݨی زمیناں دی قربانی دی تعریف کریندے ہوئیں آکھیے جو انہاں قربانیاں کوں نظر انداز نی کیتا ونڄ سڳدا ۔ ملک کیتے قربانیاں ݙیوݨ آلیں دی اولاد توں مخاطب تھیوݨ تے خوشی اے۔  وزیراعظم آکھیے خیبر پختونخوا  پاکستان دا سوہݨا صوبہ اے جیں کوں اللہ تعالیٰ سوہݨے پہاڑاں ،دریاواں  تے وسائل توں نوازیے اتے اتھاں دے عوام محنتی اتے بہادر ہن۔ جے گزریل دور اچ علاقے دی ترقی  کیتے کم کیتا ڳیا ہوندا تاں اے سوہݨا خطہ اتے پاکستان اقوام عالم اچ ترقی یافتہ  شمار ہوندا لیکن ماسوائے نواز شریف دے سنہرے دور  یا ٻئے مختصر ادوار دے من حیث القوم  انہاں بزرگاں اتے شہیداں  کیتے کجھ نی کیتا ڳیا جنہاں پاکستان کیتے آپݨے جان و مال دی قربانیاں ݙتن۔ ایں دی بجائے سفارش ، اقربا پروری اتے رشوت سکہ رائج الوقت بݨ ڳئے ۔اڄ ساݙے عظیم بزرگاں  تے شہیداں دیاں روحاں قبراں اچ تڑپدیاں پیاں ہوسن کیوں جو اے او پاکستان کائنی جیں کیتے انہان آپݨے جان و مال دی قربانی ݙتی۔ وزیراعظم آکھیے گزریے ویلھےدا ماتم کرݨ دے بجائے ایں توں سبق سکھ تے اڳوں ودھݨا ہوسی ۔ میکوں یقین اے پاکستان وختی ترقی یافتہ ملکاں دی صف اچ رل ویسی لیکن شرط اے ہے جو پوری سیاسی قیادت  اتے سارے اداریں دے سربراہان رل تے ملک دی تقدیر بدلݨ دا عزم صمیم کر گھنن تاں کوئی چیز ملک دی ترقی اتے خوشحالی دے رستے اچ نی آسڳدی ۔انہاں چین،  سعودی عرب،  یو اے ای ، قطر سودھے سارے دوست ملکاں دا شکریہ ادا کیتے جنہاں اوکھے ویلھے اچ پاکستان دی مدد کیتی ۔ وزیراعظم ملک دی عسکری قیادت دی معاونت دی وی تعریف کیتی تے آکھیے یک جان ݙو قالب تھی تے اڳوں ودھسوں تاں ملک ترقی دے رستے ٹرسی ۔ وزیراعظم انجنیئر امیر مقام اتے کیپٹن (ر) محمد صفدر دے مطالبے تے علاقے اچ 2 کالجز دے قیام  تے کالا ڈھاکہ اچ بجلی  دی فراہمی دے منصوبے دی منظوری دا وی اعلان کیتے ۔ ایندے توں پہلے وزیراعظم دے مشیر انجینئر امیر مقام اتے مسلم لیگ (ن) دے رہنما کپٹن محمد صفدر وی تقریب توں خطاب کیتا۔