آذربائیجان نال ایل این جی معاہدے توں سانجھے تعلقات دے نویں رستے کھلسن ، ملک اچ سستی ایل این جی ملسی ، وزیر اعظم شہباز شریف

لاہور۔ 24 جولائی (اے پی پی) وزیر اعظم محمد شہباز شریف آکھیے حکومت عام آدمی کوں بنیادی سہولتاں ݙیوݨ کیتے سارے وسائل استعمال کریندی پئی اے ،آذربائیجان تے پاکستان وچال ایل این جی معاہدے توں سانجھے تعلقات دے نویں رستے کھلسن ، ݙوہیں بھرا ملکاں وچال تعلقات دے حوالے نال اڄ اہم ݙینھ اے ۔اے ڳالھ انہاں گورنر ہائوس لاہور اچ پاکستان اتے آذربائیجان وچال پٹرولیم دی صنعت اچ تعاون  دے معاہدے دے حوالے نال منعقدہ تقریب توں خطاب کریندے ہوئیں آکھی اے ۔وزیراعظم محمد شہباز شریف آکھیے اڄ دا ݙینھ ݙوہیں بھرا ملکاں وچال تعلقات دے حوالے نال ھک اہم ݙینھ اے ۔ حکومت پاکستان آذربائیجان توں ماہانہ ھک جہاز ایل این جی مل گھنسی ۔مل گھنݨ دا اختیار پاکستان کنے ہوسی جیں توں ایل این جی مل نہ گھنݨ تے ہرجانہ نہ ہوسی ۔ ایں معاہدے توں ملک اچ سستی ایل این جی ملسی تے اے انرجی دے بحران نال نبݨݨ اچ ٻہوں وݙی پیش رفت ثابت تھیسی ۔وزیر اعظم محمد شہباز شریف آکھیے ایں معاہدے دی مدت ھک سال تئیں ہے جیں کوں مزید ھک سال تئیں ودھایا ونڄ سڳسی ، انہاں آکھیے ایں پٹرولیم معاہدے تے گزریل سال آذربائیجان اچ صدر الہام علیوف نال مفید ڳالھ مہاڑ تھئی ہئی ۔وزیرمملکت ڈاکٹر مصدق ملک  ، سیکرٹری پٹرولیم اتے وزیر خرانہ اسحاق ڈاراتے انہاں دی ٹیم معاہدے اچ آپݨا چنڳاں کردار ادا کیتے ۔ وزیراعظم شہباز شریف آکھیے میں آذربائیجان دے صدر اتے پاکستان اچ آذربائیجان دے سفیردا وی شکریہ ادا کرینداں جنہاں ایں معاہدے کوں توڑ پڄاوݨ کیتے چنڳاں کردار نبھائے ۔ وزیراعظم شہباز شریف آکھیے آئی ایم ایف نال معاہدے دی وجہ توں بجلی دیاں قیمتاں ودھاݨیاں پئن تاں جو حکومت ایں ودھارے دا ٻوجھ غریب آدمی تے نہ پیسی ۔ 31 فیصد گھریلو صارفین کوں جزوی سبسڈی ݙتی ڳئی اے ۔ بجلی دے 200 یونٹ تئیں دے گھریلو صارفین تے قیمت اچ ودھارے دا اطلاق نہ تھیسی۔