نگران وزیر اعظم انوار الحق کاکڑ اقتصادی تعاون تنظیم دے سربراہ اجلاس اچ شرکت کیتے ازبکستان دا دورہ کریسن، ترجمان دفتر خارجہ

اسلام آباد۔2نومبر  (اے پی پی)  نگران وزیر اعظم انوار الحق کاکڑ اقتصادی تعاون تنظیم دے سربراہ اجلاس اچ شرکت کیتے ازبکستان دا دورہ کریسن، ترجمان دفتر خارجہ ممتاز زہرہ بلوچ خمیس کوں پریس بریفنگ اچ آکھیا جو وزیراعظم اٹھ اتے نو نومبر کوں ازبکستان دے دارالحکومت تاشقند اچ اقتصادی تعاون تنظیم دے سربراہ اجلاس اچ شریک تھیسن۔ ترجمان آکھیا جو وزیراعظم اجلاس اچ شرکت کرݨ آلے رکن ملکاں دے سربراہواں نال وی ملاقاتاں کریسن۔ ترجمان فلسطین بارے ڳالھ کریندیں ہوئیں آکھیا جو پاکستان کوں فلسطین دی صورتحال تے تشویش اے۔  اسرائیل دی قابض افواج فلسطین اچ جنگی جرائم کریندی پئن۔ گزریل ݙینھ سینیٹ اجلاس اچ فلسطینیاں تے تھیوݨ آلے مظالم دے خلاف قرارداد منظوری کیتی ڳئی اے۔ اقوام متحدہ کوں غزہ اچ محاصرے دے خاتمہ، بمباری روکݨ اتے انسانی بنیاداں تے کراسنگ کھولݨ تے زور ݙیوݨا چاہیدے۔ ترجمان آکھیا جو بھارت دے غیر قانونی قبضے اچ جموں تے کشمیر اچ بھارتی مظالم جاری ہن۔ گزریل مہینے قابض فوج مقبوضہ کشمیر اچ 17 کشمیریاں کوں شہید کیتے۔ گزریل کئی ڈھاکیاں توں کشمیریاں تے ظلم تھیندا پئے۔ بھارتی ایجنسیاں پاکستان اچ جاسوسی، دہشت گردی اتے شر پسندی اچ ملوث ہن۔