ماحولیاتی تبدیلیاں نال نبݨݨ تے گلیشیئرز دے تحفظ سانڳے وختی عالمی اقدامات دی لوڑھ اے ، نگران وفاقی وزیر تعلیم مدد علی سندھی

اسلام آباد۔10نومبر(اے پی پی) نگران  وفاقی وزیر تعلیم مدد علی سندھی آکھیے ماحولیاتی تبدیلیاں نال نبݨݨ تے گلیشیئرز دے تحفظ سانڳے وختی عالمی اقدامات دی  لوڑھ اے ۔ فرانس اچ پاکستان دے سفارت خانے توں جاری بیان موجب اے ڳالھ انہاں پیرس اچ ”ون پلینیٹ ۔پولر سمٹ“ توں خطاب کریندے ہوئیں آکھی اے ۔ انہاں شرکادی توجہ ”تھرڈ پول“ دے پاسے کرائی جیڑھے جو ہمالیہ، قراقرم اتے ہندوکش خطے تے مشتمل اے اتے قطبی خطے توں ٻاہر زمین تے ساریں توں ودھ سائروسفیرک ذخیرے رکھیندے ۔ انہاں آکھیے پاکستان اچ ہمالیہ، قراقرم اتے ہندوکش دی حدود اچ 7ہزار توں ودھ گلیشیئرز موجود ہن جیڑھے جو تقریباً 15 ہزار مربع کلومیٹر دے رقبے تے ہن ۔ مدد علی سندھی آکھیے اے خطہ خاص طور تے ماحولیاتی  تبدیلیاں دا شکار اے جݙاں جو ”تھرڈ پول“ دنیادا ساریں توں وݙا ذخیرہ اے اتے اے تقریباً 2 ارب لوکاں مٹھا پاݨی ݙیوݨ سانڳے اہم اے۔ نگران وفاقی آکھیے ماحولیاتی نظام، حیاتیاتی تنوع، غذائی تحفظ سارے خطرے اچ ہن ، ساݙے برفانی تودے اتے برفانی جھیل دے پھٹݨ دا خطرہ کئی گنا ودھ ڳئے ۔ انہاں 2022 اچ شیشپر گلیشیئر دے واقعے دا حوالہ ݙتا جیں دے نتیجے اچ پاکستان اچ تباہ کن چھل آئی۔