نگراں حکومت انتخابی عمل کوں صاف ،شفاف  یقینی بݨاوݨ کیتے اپݨی ذمہ واری پوری کریندی پئی اے ، صحافیاں دا کم خبرݙیوݨ اے ، کہیں وی سیاست جماعت یا امیدوار آلے جھکاؤ پیدا نی کرݨا چاہیدا ، نگراں وفاقی وزیر مرتضی سولنگی

اسلام آباد۔10نومبر(اے پی پی) نگراں وفاقی وزیر اطلاعات و نشریات مرتضی سولنگی آکھیے ہݨ عام انتخابات دے حوالے نال کہیں کوں کوئی شک نی ہووݨا چاہیدا، انتخابی عمل کوں صاف ،شفاف یقینی بݨاوݨ نگراں حکومت دی ذمہ واری اے ، اساں آپݨی ذمے واری پوری ایمانداری نال نبھیندے پیوں ، میڈیا دا کردارٻہوں اہم اے ،صحافیاں دا کم خبر ݙیوݨ کہیں وی سیاست جماعت یا امیدوار دے پاسے جھکائو پیدا کرݨا کائنی ۔ او نیشنل پریس کلب ، یونیسکو تے آئی آر اے ڈی اے دی سانجھ نال صحافیاں دے خلاف تشدد ، انتخابات دی شفافیت ، عوامی قیادت دے کردار دے حوالے نال سیمینارتوں خطاب کریندے پئے ہن ۔ وفاقی وزیر اطلاعات و نشریات مرتضی سولنگی آکھیے صحافی جمہوریت ، آئین ،  قانون دی حکمرانی دے نال ہن، انتخابی عمل دی ڈور اچ کوئی جانبداری کائنی ،ایویں نگراں حکومت دی ذمہ واری اے جو او ایں ڈور اچ کہیں جماعت یا امیدوار دی طرف داری یا مخالفت نہ کرے ۔ انہاں آکھیے صحافیاں کیتے وی ضروری اے جو او انتخابی عمل دی ایماندارانہ رپورٹنگ کرن ، اے نظر نہ آوے جو انہاں دا جھکاؤ ھک جماعت یا امیدوار آلے پاسے اے ، انہاں آکھیے صحافیاں دا کم خبر ݙیوݨ اے ،اے افسوسناک اے جو تساں خبر بݨ ونڄو ، جان محمد مہر دے واقعہ تے وی میݙی وزیراعلی سندھ نال ڳالھ تھئی اے ،  ایجھے واقعات ریاست یا حکومت کیتے فخر دی ڳالھ نی ہوندی۔ انہاں آکھیے صحافی دا جے قتل تھیندے تاں ایندے ذمے واراں کوں وٹھݨ ریاست دی ذمہ واری اے، افسوس نال آکھداں جو جان محمد اساں شرمندہ ہیسے ،تیݙے قاتل زندہ ہن،  پوری کوشش کریساں جان محمد دے قاتل وٹھیے ونڄن۔ انہاں آکھیے اساں خود دی کوشش کر سڳدوں جو اساں خبر نہ بݨ ونڄوں ، معلومات ھک طاقت اے او ھک پاسے کوں فیدہ تے ݙوجھے پاسے کوں ضیان ݙیندا پئے ہوندن ، جنھاں دا ضیان تھیندے انہاں دا نزلہ کمزور صحافیاں تے ڈھاندے ۔ انہاں ایہو سویں واقعات تے ارلی الرٹ سسٹم بݨاوݨ دی تجویز ݙیندے ہوئیں آکھیے جو اے سسٹم  ویھلے دی اہم لوڑھ اے ۔ انہاں آکھیے ہݨ کہیں کوں کوئی شک نی ہووݨا چاہیدا ، اساں پہلے ݙینھ ہی آکھیا ہئی جو انتخابات الیکشن کمیشن دی ذمہ واری اے ، آئین اتے قانون دے تحت ذمہ واری الیکشن کمیشن پوری کریندا پئے ،  حلقہ بندیاں دا مرحلہ چھیکڑی مرحلے اچ داخل تھی چکیے ، اساں ساریں دی کوشش ہووݨی چاہیدی اے جو آندے الیکشن متعلق حقائق لوکاں تئیں پڄاؤں تے لوکاں دے مسئلے چاؤں ۔ انہاں آکھیے افسوس دی ڳالھ اے جو کروڑاں  روپے دے بجٹ نال چینل بݨدن ، مارکیٹ توں لوکاں کوں اپݨے اداریں اچ ݙوگنا تنخواہ اتے مراعات تے گھن نگھندن تے کجھ ویلھے بعد ردی دی ٹوکری اچ سٹ ݙیندن ، ایجھا سلوک مناسب کائنی ، آئین تے قانون ایندی اجازت نی ݙیندا ، پیمرا ترمیمی ایکٹ اچ ایندا باقاعدہ میکنزم موجود اے ۔ صحافتی تنظیماں ،متاثرہ صحافی ، اینکر خود  تحریری طور تے ݙساون تاں جو قانون دے مطابق کارروائی اڳوں ودھائی ونڄے۔  پی ایف یو جے دے صدر افضل بٹ آکھیے الیکشن کمیشن اتے وزارت اطلاعات رل تے الیکشن کوریج دے حوالے نال اسلام آباد  تے چارے صوبیں اچ  تربیتی سیشن دا انعقاد کرے ، غلط رپورٹنگ پورے عمل کوں متنازعہ بݨیندی اے ۔ ایں موقع تے  نیشنل  پریس کلب دے صدر انور رضا اتے ٻئے وی سیمینار اچ موجود ہن۔