غزہ دی صورتحال دے تباہ کن اثرات خطے توں ٻاھرو وی کھنݙ سڳدن، عالمی برادری اتے اقوام متحدہ غزہ اچ قتل عام روکݨ دی ذمہ داری نبھاوے، نگران وزیر اعظم انوار الحق کاکڑ دا او آئی سی اجلاس نال خطاب

ریاض۔11نومبر  (اے پی پی):نگراں وزیر اعظم انوارالحق کاکڑ غزہ دی صورتحال تے چنتا کریندے ہوئے فلسطین نال یکجہتی کیتی اے اتے ہتھو خالی فلسطینیاں خاص کر ٻالاں اتے تریمیتں سودھا ہسپتالاں، سکولاں، رہائشی عمارتاں کوں مسلسل بمباری اتے بربریت دا نشانہ ٻݨاوݨ تے ودھ مذمت کریندے چتائے جو غزہ دی صورتحال دے تباہ کن اثرات خطے توں ٻاھرو وی کھنݙ سڳدن، عالمی برادری اتے اقوام متحدہ غزہ اچ قتل عام روکݨ دی ذمہ داری نبھاوے۔ سعودی عرب دے دارالحکومت ریاض اچ غزہ دی صورتحال تے سانڄھی حکمت عملی کیتے سݙیے ونڄݨ آلے اسلامی ملکاں دی تنظیم( او آئی سی) دے ہنگامی اجلاس نال خطاب کریندے ہوئے نگران وزیر اعظم انوار الحق کاکڑ آکھیے جو غزہ اچ قتل عام فوری روکیا ونڄے، پاکستان1967 دی سرحداں دے مطابق ریاست فلسطین دے قیام دا حامی اے جیندا دارالحکومت القدس ہووے، ناانصافی اتے معصوم شہریاں دا قتل عام ٻئے ڄھیڑے ودھیسی۔ انہاں آکھیا جو اسرائیل ہک جارح اتے قابض ملک اے، 70سال پہلے اقوام متحدہ اپݨی منظور کردہ قرارداد نال ایں مسئلہ دے حل دا فیصلہ کیتے ٻھل اسرائیلی قابض افواج ولوں طاقت دے اندھا دھند استعمال اتے ہسپتالاں، پناہ گزیناں دے کیمپاں، سکولاں اتے رہائشی عمارتاں سودھا اقوام متحدہ دے دفاتر وی بمباری نال محفوظ نئیں رہے، ایںصورتحال نال 10 ہزار توں ودھ قیمتی جاناں دا ضیان تھئے، انہاں اچ ودھ تعداد معصوم ٻالاں اتے تریمتیں دی اے اتے ہزاراں فلسطینی ٹٻراں کوں زبردستی گھر چھوڑݨا پئے، انہاں غزہ اچ غیر مشروط جنگ بندی تے زور ݙیندے آکھیے جو غزہ دا محاصرہ فوری ختم تھیوݨا چاہیدے، ہݨ اقوام متحدہ دی ذمہ داری اے جو او غزہ اچ فوری انسانی ہمدردی دے تحت انسانی اتے طبی امداد پچاوݨ سودھا اسرائیل کوں ٻئی خونریزی توں روکݨ کیتے کردار ادا کرے۔ انوار الحق کاکڑ دا آکھݨ ہا جو عالمی برادری، اسلامی ممالک، اقوام متحدہ اتے ایندے متعلقہ ادارے انصاف اتے انسانیت دے اصولاں کوں برقرار رکھݨ اتے فلسطینیاں دے قتل عام کوں مکاوݨ کیتے عملی اقدامات کرن ڄݙاں جو ایں معاملے تے ساری صورت حال دے مطابق اجتماعی ردعمل ݙیوݨا ٻہوں ضروری اے۔