پاکستان، ازبکستان اتے افغانستان دے وزراء تجارت دا سہ فریقی اجلاس

اسلام آباد۔14نومبر(اے پی پی) نگراں وفاقی وزیر تجارت ڈاکٹر گوہر اعجاز، افغانستان دے وزیر  صنعت و تجارت الحاجی نور الدین عزیزی اتے ازبکستان دے نائب وزیر اعظم و وزیر تجارت  ڈاکٹر جمشید خدجائیف منڳل کوں پہلے سہ فریقی اجلاس دی سانجھی صدارت کیتی۔وزارت توں جاری پریس ریلیز موجب اجلاس دا مقصد اقتصادی تعلقات، علاقائی تعاون اتے رابطے کوں تکڑا بݨاوݨاں اے ۔ اجلاس اچ ترائی ملکاں وچال تجارتی تعلقات ودھاوݨ تے توجہ ݙتی ڳئی ۔ اجلاس اچ تجارتی رکاوٹاں کوں ہٹاوݨ ، کسٹمز دے طریقہ کار کوں سوکھا بݨاوݨ ، اتے سرحد پار تجارت کوں ودھارا ݙیوݨ تے توجہ ݙتی ڳئی اے مختلف شعبیں اچ سرمایہ کاری دے موقع دا جائزہ ڳھدا ڳئے جیں نال سانجھے منصوبیں ، پبلک پرائیویٹ پارٹنرشپ اتے براہ راست غیر ملکی سرمایہ کاری ودھاوݨ دے رستے کھلسن ۔ ترائی ملکاں دے وزراء علاقائی رابطے دی اہمیت کوں منیندے ہوئیں نقل و حمل دے نیٹ ورکس ودھاوݨ تے سامان دی برآمد اتے درآمد سوکھی بݨاوݨ تے طریقیں تے ڳالھ مہاڑ کیتی ڳئی ۔ وزیر تجارت  ڈاکٹر گوہر اعجازآکھیے جو سہ فریقی تعاون نال ترائی ملکاں اچ اقتصادی ترقی کوں تکھا کرݨ اچ مدد ملسی ۔ انہاں آکھیے آپݨی استعداد اتے وسائل کوں استعمال اچ گھن آندے ہوئیں پاکستان، افغانستان تے ازبکستان دی نویاں منڈیاں تئیں رسائی مل سڳدی اے تے معیشت کوں ودھارا ݙتا ونڄ سڳدے ۔