حج پالیسی 2024 دااعلان ، پیکج گزریل سال توں ھک لکھ روپے سستا ، درخواستاں 27 نومبر توں 12 دسمبر تئیں وصول کیتیاں ویسن، نگران  وفاقی وزیر مذہبی امور

اسلام آباد۔16نومبر(اے پی پی) وفاقی حکومت حج پالیسی 2024 دااعلان کر ݙتے، حج پیکج گزریل سال دے مقابلے اچ ھک لکھ روپے سستا ہوسی ، حج درخواستاں 27 نومبر توں 12 دسمبر تئیں وصول کیتیاں ویسن ، پاکستان داحج کوٹہ ھک لکھ 79ہزار 210 مقرر کیتا ڳئے ،سرکاری سپانسر شپ سکیم پہلے آؤ پہلے پاؤدے اصول تے ہوسی ایندے اچ قرعہ اندازی توں استثنیٰ ہوسی، لانگ حج پیکج 38 توں 42 ݙینھ تے شارٹ حج پیکج 20 توں 25 ݙینھ دا ہوسی ،کہییں کوں مفت حج نہ کرایا ویسی ۔نگران  وفاقی وزیر مذہبی امور انیق احمد پریس کانفرنس اچ حج پالیسی 2024 دا اعلان کیتے۔ انہاں آکھیے لانگ حج پیکج دے تحت  ریگولر حج سکیم  دے خرچے جنوبی ریجن (کراچی، کوئٹہ ، سکھر) کیتے 10لکھ 65 ہزار روپے  ، شمالی ریجن کیتے 10 لکھ 75ہزار روپے، لانگ حج پیکج دے تحت  سپانسرشپ حج سکیم دے خرچے جنوبی ریجن کیتے 3765 ڈالر اتے شمالی ریجن کیتے  3800 ڈالرہوسن ۔ لانگ حج پیکج  مدینہ اچ 8 ݙینھ دے قیام نال 38  توں 42 ݙینھ دا ہوسی ، شارٹ حج پیکج مدینہ اچ 3 توں 5 ݙینھ دے قیام نال 20 توں 25 ݙینھ دا ہوسی شارٹ حج پیکج  دے تحت ریگولر حج سکیم دے خرچے جنوبی ریجن کیتے 11لکھ 40 ہزار اتے شمالی ریجن کیتے 11 لاکھ 50 ہزار روپے جݙاں جو شارٹ حج پیکج دےتحت سپانسر شپ حج سکیم دے خرچے جنوبی ریجن کیتے 4015 اتے شمالی ریجن کیتے 4050 ڈالر ہوسن ۔