حکومت عازمین حج کوں بہترین سہولتاں ݙیوݨ سانڳے پرعزم اے، نگران وفاقی وزیر مذہبی امور

کراچی۔ 20 نومبر(اے پی پی) نگران وفاقی وزیر مذہبی امورو و بین المذاہب ہم آہنگی انیق احمد آکھیے حکومت عازمین حج کوں بہترین سہولتاں ݙیوݨ سانڳے پرعزم اے کیوں جو شہریاں کوں مذہبی رسومات اتے عبادات دی ادائیگی اچ سہولت ݙیوݨ ریاست دی ذمہ واریاں اچ شامل اے ،ملک اچ پہلی واری نہ صرف حج خرچے گھٹ کیتے ڳئن بلکہ وزارت حاجیاں کوں ودھ توں توں ودھ سہولتاں ݙیوݨ کیتے کم کریندی پئی اے ۔ اے ڳالھ انہاں حج 2024 دے حج پورٹل دے حوالے نال بینکرز ٹریننگ دی افتتاحی تقریب توں خطاب کریندے ہوئیں آکھی اے ۔ انہاں آکھیے حج خرچے گزریل سال دے 11لکھ 75ہزار روپے توں گھٹ تھی تے اڄوکے سال 10 لکھ 75ہزار روپے رہ ڳئن جݙاں جو فضائی کرائے اچ گھٹکی سانڳے ایئر لائنزنال ڳالھ مہاڑ جاری اے ۔ انہاں مزید آکھیے جو ہوائی ٹکٹ اچ کٹوتی دی صورت اچ متعلقہ رقم حجاج کرام دے کھاتیں اچ منتقل کرݙتی ویسی ۔ وفاقی وزیر ݙسائے جو اڄوکے سال متعارف کرائی ونڄݨ آلی ھک ٻئی اختراعی سہولت  حجاج سانڳے ایپ دا اجراء اے جیڑھی جو حجاج کرام کوں حج دی درخواست داخل کرݨ  توں گھن تے حجاز مقدس توں واپسی تئیں اپ ڈیٹ ݙیسی ۔انہاں آکھیے ‘روڈ ٹو مکہ’ پروگرام، سعودی حکومت دی طرفوں حاجیاں کوں ݙتی ونڄݨ آلی ھک سہولت اے جیڑھی جو پہلے صرف اسلام آباد تئیں محدود ہئی لیکن اڄوکے سال اینکوں کراچی ایئرپورٹ تئیں ودھایا ویسی ۔