نگران وفاقی وزیر اطلاعات مرتضیٰ سولنگی ووٹ کاسٹ کرݙتا

اسلام آباد۔8فروری (اے پی پی) نگران وفاقی وزیر اطلاعات، نشریات و پارلیمانی امور مرتضیٰ سولنگی حلقہ این اے 46 اسلام آباد۔I دے پولنگ اسٹیشن اسلام آباد ماڈل سکول ڈورہ اچ ساریں توں پہلا ووٹ کاسٹ کیتا۔ وفاقی وزیر اطلاعات خمیس کوں سویلے 8 وڄے توں پہلے پولنگ پولنگ اسٹیشن پڄے تے ساریں توں پہلے آپݨا ووٹ کاسٹ کیتے ۔ ایں موقع تے ڳالھ مہاڑ کریندے ہوئیں نگران وفاقی وزیر اطلاعات آکھیے ووٹ ھک قومی فریضہ اے جیڑھا جو ہر ذمہ دار شہری ادا کرݨا اے، آزادانہ تے شفاف انتخابات ملک اچ جمہوریت کوں تکڑا بݨیندن ۔ انہاں آکھیے آپݨے تے آپݨی نسلاں دے روشن مستقبل سانڳے عوام ووٹ ضرورپاون ۔ انہاں ایں امید دا اظہار کیتے جو پورے ملک اچ ووٹنگ دا عمل پرامن اتے منظم طریقے نال مکمل تھیسی ۔ واضح رہے جو حلقہ این اے 46 اسلام آباد I اچ مجموعی طور تے 44 امیدوار مد مقابل ہن۔ ایں حلقے اچ رجسٹرڈ ووٹرز دی تعداد 3 لکھ 50 ہزار 581 اے، تریمت ووٹرز دی تعداد ھک لکھ 66 ہزار 656 جݙاں جو مرد ووٹرز دی تعداد ھک لکھ 83 ہزار 925 اے۔ حلقہ این اے 46 اسلام آباد I اچ مجموعی طور تے 342 پولنگ اسٹیشن جݙاں جو  1033 پولنگ بوتھس بݨائے ڳن۔