وزیرِ خزانہ دی زیرِ صدارت گیس دے شعبے اچ اصلاحات متعلق اجلاس، تنظیمِ نو تے ڈی ریگولیشن دے مجوزہ لائحۂ عمل دا جائزہ

اسلام آباد۔19 اکتوبر (اے پی پی) وفاقی وزیرِ خزانہ و محصولات سینیٹر محمد اورنگزیب گیس دے شعبے اچ اصلاحات تے مرحلہ وار تے مشاورت دے ذریعے عملدرآمد کرݨ دے حکومتی عزم دا اعادہ کریندے آکھیے جو گیس دے شعبے اچ مالی پائیداری کوں تکڑا بݨاوݨ، آپریشنل کارکردگی اچ بہتری، سرمایہ کاری دے ودھارے تے صارفین دے مفادات دا تحفظ یقینی بݨیندے گیس دی زیادہ مسابقتی منڈی تشکیل ݙیوݨ کیتے ساریاں کوششاں کوں یقینی بݨایا ویندا پئے۔انہاں اے ڳالھ اتھاں پاکستان دے گیس دے شعبے اچ تنظیمِ نو تے ڈی ریگولیشن دے مجوزہ لائحۂ عمل دا جائزہ گھنݨ کیتے منعقدہ اعلیٰ سطح دے اجلاس اچ آکھی۔ اجلاس اچ شعبے دی مالی استحکام، آپریشنل کارکردگی، صارفین دے مفادات دے تحفظ تے نجی شعبے دی ودھ توں ودھ شمولیت تے توجہ مرکوز کیتی ڳئی۔اجلاس کوں ݙسایا ڳیا جو مجوزہ اصلاحات دا مقصد گیس دی ہک ایجھی مالی طور تے پائیدار، مؤثر تے مسابقتی منڈی قائم کرݨا اے جیندے نال تجارتی سرگرمیاں کوں سہارا ملے، نجی سرمایہ کاری دی حوصلہ افزائی تھیوے تے صارفین دے مفادات دا تحفظ یقینی بݨایا ونڄ سڳے۔اجلاس اچ مؤثر ضابطہ کاری، آپریشنل کارکردگی اچ بہتری تے گیس دی قیمتاں دے تعین تے فراہمی کیتے زیادہ پائیدار طریقۂ کار دے تحت مرحلہ وار مسابقتی نظام دے پاسے پیشرفت تے غور کیتا ڳیا۔ مجوزہ فریم ورک دی تیاری اچ ترکیہ تے برطانیہ سودھے ٻئے ملکاں اچ گیس دے شعبے دی اصلاحات دے بین الاقوامی تجربیں توں فیدہ چاتا ڳئے تاں جو پاکستان دے ادارہ جاتی ڈھانچے، منڈی دے حالات تے صارفین دے مفادات کوں وی سامݨے رکھیا ڳئے۔شرکاء ایں ڳالھ تے وی زور ݙتا جو اصلاحات تے مرحلہ وار تے مناسب ترتیب نال عمل کیتا ونڄے تاں جو گیس ݙیوݨ دا تسلسل برقرار رہے، ضابطہ جاتی نظام دے تحت آوݨ آلے صارفین دے مفادات دا تحفظ ہووے تے نجی شعبے دی شمولیت کیتے ہک مستحکم تے قابلِ پیش گوئی ماحول ݙتا ونڄ سڳے۔اجلاس اچ وفاقی وزیرِ پٹرولیم، وزیراعظم دے مشیرنجکاری، وزیراعظم دے معاونِ خصوصی توانائی، وزارتِ پٹرولیم تے وزارتِ خزانہ دے سینئر حکام، گیس یوٹیلیٹی کمپنیاں دے نمائندیں تے عالمی بینک دی ٹیم شرکت کیتی۔