ووٹ پاوݨ حب الوطنی دی نشانی اے، ووٹ دا حق استعمال کرتے ہی ملک کوں اڳوں ودھایا ونڄ سڳدے ، نگران وفاقی وزیر اطلاعات مرتضیٰ سولنگی دی پی ٹی وی دی الیکشن دے حوالے نال خصوصی ٹرانسمیشن اچ ڳالھ مہاڑ

اسلام آباد۔8فروری(اے پی پی) نگران وفاقی وزیر اطلاعات، نشریات و پارلیمانی امور مرتضیٰ سولنگی آکھیے ووٹ پاوݨ حب الوطنی دی نشانی اے، ووٹ دا حق استعمال کر تے ہی ملک کوں اڳوں ودھایا ونڄ سڳدے ۔اے ڳالھ انہاں پی ٹی وی دی الیکشن دے حوالے نال خصوصی ٹرانسمیشن اچ آکھی اے ۔ نگران وفاقی وزیر اطلاعات آکھیے حلقہ این اے 46 اسلام آباد۔I دے پولنگ اسٹیشن اچ اڄ وٹ کاسٹ کرݨ آلے او ساریں توں پہلے ووٹر ہن ۔ انہاں آکھیے 12 کروڑ پاکستانی عوام اپݨی پسند دے امیدوار یا جماعت کوں ووٹ پاون ، ووٹ پاوݨ نال ہی آپݨے امیدوار دی چُݨ ممکن اے ۔ انہاں آکھیے ووٹ پاوݨ حب الوطنی دی نشانی اے۔ ھک سوال دے جواب اچ وفاقی وزیر اطلاعات آکھیے بطور نگران وزیر اطلاعات پہلی پریس بریفنگ اچ میں وں پہلا سوال ہی الیکشن کراوݨ بارے کیتا ڳیا ہئی ۔ انہاں آکھیے نگران حکومت دے پورے عرصے دے دوران الیکشن دے حوالے نال ڳالھیں کیتیاں ویندیاں رہیاں ، پہلے ݙینھ توں ہی وختی انتخابات سانڳے یکسو ہامی، الیکشن دے انعقاد سانڳے اساں بھرپور ذمہ واری دا مظاہرہ کیتا، الیکشن التواء سانڳے سینیٹ اچ قرارداد دی مخالفت کیتی، اڄ الیکشن کراوݨ دے حوالے نال ساریاں ڳالھیں مسترد تھی ڳئن ۔ ھک سوال دے جواب اچ انہاں آکھیے ملک کوں بہتر حالت اچ منتخب نمائندیں دے حوالے کریسوں ۔ اساں حالی تئیں آپݨے وعدے تے قائم رہیوں ۔ انہاں آکھیے نگران حکومت کوں سکیورٹی اتے معیشت سودھے سارے ٻئے مسئلے وی ہن ، نگران کابینہ جݙاں حلف چاتا تاں ڈالر دی قیمت 296 روپے ہئی جݙاں جو اوپن مارکیٹ اچ ڈالر 350 توں 400 روپے اچ ملدا پیا ہئی ۔ انہاں آکھیے معیشت ملک دا ساریں توں وݙا مسئلہ اے ، عوام دے اصل مسئلیں تے ساریں دا اتفاق رائے اے۔ وفاقی وزیر آکھیے پاکستان دے آئین دے دیباچے اچ لکھیے جو اے ملک ایندے منتخب نمائندے چلسین ۔ انہاں آکھیے مستقبل دی قیادت دا فوکس ملک دے عوام تے معیشت ہوسی۔ وفاقی وزیر آکھیے سال 2024ءدنیا دے ٻہوں سارے ملکاں اچ انتخابات دا سال اے، پاکستان دے پورے انتخابی عمل تے دنیا دیاں نظراں ہن ، 200  توں ودھ غیر ملکی اداریں سانڳے کم کرݨ آلے صحافی پہلے ہی پاکستان اچ موجود ہن ، انتخابات دی کوریج سانڳے غیر ملکی صحافی تے مبصرین پاکستان آئے ہوئے ہن۔ انہاں آکھیے کجھ لوک ملک اچ عدم استحکام پیدا کرݨ چاہندن  ۔ وفاقی وزیر اطلاعات آکھیے پی ٹی وی قومی نشریاتی ادارہ اے، ایندے معیار کوں مزید اُچا کریسوں ۔