معیشت دی بہتری ترجیح، برآمدات اتے برآمدی صنعت کوں ہر سوکھ ݙیسوں، وزیرِ اعظم دا ملکی معیشت بارے اجلاس نال خطاب

اسلام آباد۔20مارچ(اے پی پی):وزیرِ اعظم محمد شہباز شریف معاشی اصلاحات دے نفاذ دی آپ نگرانی کرݨ دا فیصلہ کریندے آکھیے جو معیشت دی بہتری حکومت دی ترجیح اے۔ او اسلام آباد اچ ملکی معیشت بارے اعلیٰ سطح اجلاس دی اڳواݨی کریندے پئے ہن جیندے اچ وفاقی وزراء احسن اقبال، محمد اورنگزیب، جام کمال خان، احد خان چیمہ، عطاء اللہ تارڑ، ڈاکٹر مصدق ملک، سردار اویس خان لغاری، گورنر سٹیٹ بینک جمیل احمد، ڈاکٹر اعجاز نبی، ڈاکٹر نوید احمد، ڈاکٹر فراز حیات اتے متعلقہ اعلیٰ حکام شرکت کیتی۔اجلاس اچ ملکی معیشت دے مختلف شعباں اچ اصلاحات دیاں تجاویز ݙتیاں ڳن، برآمدات اچ ودھارے، بجلی شعبے دی ترقی، محصولات ودھاوݨ، صنعتی ترقی بارے جامع روڈ میپ ݙتا ڳیا۔ وزیراعظم آکھیے جو ملکی معیشت دے استحکام و ترقی کیتے بین الاقوامی ماہرین اتے سارے فریقین کوں مشاورت اچ رلاوݨ دا فیصلہ کیتے۔ برآمدات دی عالمی منڈی تئیں پڄ، برآمدی صنعت کوں سوکھ ݙیسوں، نویں ٹیکس دی بجائے ٹیکس نیٹ ودھا تے محصولات ودھیسوں، چھوٹے، درمیانے اتے وݙے پیمانے دی صنعت کوں ترقی ݙیسوں۔ وزیرِاعظم معیشت دے شعباں دی مرحلہ وار اصلاحات تے رپورٹ ݙیوݨ دی ہدایت کیتی۔ وزیرِاعظم آزاد جموں و کشمیر اتے گلگت بلتستان اچ سکل ڈویلپمنٹ پروگرام دا وی آکھیا۔