وفاقی وزیرِ آئی ٹی شزا فاطمہ خواجہ جنوبی کوریا روانہ، پاکستان “ڈیجیٹل اینڈ اے آئی کمپیکٹ” تے دستخط کرݨ آلا دنیا دا پہلا ملک بݨسی

اسلام آباد۔18 اکتوبر (اے پی پی) پاکستان “ڈیجیٹل اینڈ اے آئی کمپیکٹ” تے دستخط کرݨ آلا دنیا دا پہلا ملک بݨݨ ویندا پئے۔ وفاقی وزیرِ آئی ٹی شزا فاطمہ خواجہ اہم سرکاری دورے تے جنوبی کوریا روانہ تھی ڳئی۔ وزارتِ آئی ٹی تے ٹیلی کمیونیکیشن توں اتوار کوں جاری اعلامیے دے مطابق شزا فاطمہ خواجہ جنوبی کوریا اچ “گلوبل اے آئی اینڈ ڈیجیٹل سمٹ 2026ء” اچ پاکستان دی نمائندگی کریسن، وفاقی وزیرِ آئی ٹی سمٹ دے دوران “اے آئی اینڈ ڈیجیٹل منسٹریل میٹنگ” اچ شرکت کریسن۔ اجلاس دے دوران پاکستان اچ مصنوعی ذہانت (AI) تے ڈیجیٹل شمولیت تے ترجیحی ڳالھ مہاڑ کیتی ویسے۔ آپݨے دورے دے دوران وفاقی وزیر دی گوگل دے وائس پریذیڈنٹ ولسن ایل وائٹ نال اہم ݙوپاسہ ملاقات تھیسی۔ وفاقی وزیر “ڈیجیٹل اینڈ اے آئی کمپیکٹ” سیشن اچ پاکستان دا مستقبل دا لائحۂ عمل پیش کریسن۔ ایں توں علاوہ شزا فاطمہ خواجہ دی ورلڈ بینک دے نائب صدر اوسمان ديون نال وی ݙوپاسہ ملاقات طے کر گھدی ڳئی اے۔ ایں توں علاوہ وفاقی وزیر عالمی سطح تے انٹرنیٹ تے ڈیجیٹل سہولتاں دی یکساں فراہمی دے حوالے نال تھیوݨ آلے اہم اجلاساں اچ ڳالھ مہاڑ کریسن۔