معیشت دے چیلنجز دے حل اتے سرمایہ کاری ودھاوݨ کیتے ایس آئی ایف سی اہم پلیٹ فارم اے، ملکی سلامتی تے ترقی کیتے اساں سارے کٹھے ہیسے، وزیراعظم محمد شہباز شریف دا ایس آئی ایف سی دی ایپکس کمیٹی دے خصوصی اجلاس توں خطاب

اسلام آباد۔21مارچ  (اے پی پی) وزیراعظم محمد شہباز شریف آکھیا جو معیشت دے چیلنجز دے حل اتے سرمایہ کاری ودھاوݨ کیتے ایس آئی ایف سی اہم پلیٹ فارم اے، ملکی سلامتی تے ترقی کیتے اساں سارے کٹھے ہیسے۔وفاقی اتے صوبیاں کوں رَل تے ملک دی ترقی تے خوشحالی کیتے کم کرݨا پوسی۔ بنیادی ڈھانچہ جاتی اصلاحات دے بغیر معیشت کوں مضبوط نی کیتا ونڄ سڳدا۔ سالانہ ترائے توں چار ٹریلین روپے دے محصولات ضائع تھیندے پئن۔ 2700 ارب روپے دے محصولات بارے مقدمے عدالتاں اچ ہن، بجلی اتے گیس دے شعبیاں دا گردشی قرضہ پنج ٹرلین روپے توں ودھ ڳئے۔ آئی ایم ایف نال سٹاف لیول معاہدے دے بعد آندے مہینے 1.10 ارب ڈالر دی قسط جاری تھی ویسی۔ اے ڳالھیں انہاں خمیس کوں خصوصی سرمایہ کاری سہولت کونسل (ایس آئی ایف سی) دی ایپکس کمیٹی دے خصوصی اجلاس توں خطاب کریندیں ہوئیں آکھی ۔ انہاں ایں موقع تے آکھیا جو مختلف سیاسی جماعتاں دے منتخب نمائندے اتے انہاں دی قیادت موجود اے، مختلف سیاسی جماعتاں دے منتخب وزراء اعلیٰ، وزرا، سرکاری افسران، آرمی چیف اتے انہاں دی ٹیم اتھ موجودگی پوری قوم کیتے سنیھا اے جو اساݙا آپݨا آپݨا منشور اے اتے آپݨی ترجیح اے پر پاکستان دی ترقی، خوشحالی اتے یکجہتی کیتے اڄ اساں اتھ ہیسے۔  وزیراعظم آکھیا جو نگران دور اچ ملکی معیشت کوں بہتر کرݨ کیتے اقدامات تے سابق نگران وزیراعظم انوار الحق کاکڑ، انہاں دی کابینہ اتے سرکاری افسراں کوں خراج تحسین پیش کیتا۔