وفاقی وزیر منصوبہ بندی احسن اقبال داچین دے شہر چینگڈو اچ ہائی ٹیک ڈویلپمنٹ زون دا دورہ، چینی کمپنیاں کوں پاکستان اچ ٹیکنالوجی پارکس بݨاوݨ دی دعوت

اسلام آباد۔1جون (اے پی پی):وفاقی وزیر منصوبہ بندی احسن اقبال چین دے شہر چینگڈو اچ چینگڈو ہائی ٹیک ڈویلپمنٹ زون (سی ڈی ایچ ٹی) دا دورہ کیتے۔ ایں موقع تے وفاقی وزیر چین پاکستان اقتصادی راہداری دے فیز-II دا حصہ بݨݨ اچ دلچسپی رکھݨِ آلے چینگڈو اچ رہݨ آلے تاجراں نال ملاقات کیتی ۔ وزارت منصوبہ بندی توں جاری پریس ریلیز موجب چینگڈو ہائی ٹیک ڈویلپمنٹ زون1988 اچ بݨایا ڳیا ہئی جیڑھا جو چین دے پہلے قومی ہائی ٹیک زونز اچوں ھک اے ۔2023 اچ چینگڈو ہائی ٹیک ڈویلپمنٹ زون 43 بلین امریکی ڈالر توں ودھ دی زونل جی ڈی پی حاصل کیتی۔237 مربع کلومیٹر دے رقبے تے محیط ایں زون اچ ھک مالیاتی ضلع، بائی ٹیکنالوجی سٹی اتے ھک سائنس تے ٹیکنالوجی پارک شامل اے، زون اچ 750,000 توں ودھ لوک کم کریندن تے 4300 کاروباری ادارے ہن ۔ دورے تے چینگڈو میونسپل دے رہنماواں اتے زونل حکام احسن اقبال کوں ٹیکنالوجی زون دی تاریخ، ترقیاتی پروفائل، ملکی اتےغیر ملکی سرمایہ کاری کوں راغب کرݨ سانڳے خصوصی پالیسیاں تے مختلف صنعتاں بارے بریفنگ ݙتی ۔احسن اقبال مقامی حکام کوں پاکستان اچ ٹیکنالوجی پارکس بݨاوݨ دی دعوت ݙتی ۔