پارلیمنٹ دا مشترکہ اجلاس، خیبر پختونخوا اچ ہنگامی حالت دے حوالے نال دستور دے آرٹیکل 232(7) تے 234(1) دے تحت قرارداداں منظور

اسلام آباد۔15 اکتوبر(اے پی پی)پارلیمنٹ دے مشترکہ اجلاس اچ صوبہ خیبر پختونخوا اچ ہنگامی حالت بارے دستور دے آرٹیکل 232(7) اتے دستور دے آرٹیکل 234(1) دے تحت قرارداداں منظور کر ڳھدیاں ڳئن۔ وفاقی وزیر برائے پارلیمانی امور ڈاکٹر طارق فضل چوہدری پارلیمنٹ دے مشترکہ اجلاس اچ تحریک پیش کیتی جو دستور دے آرٹیکل 232 دی شق (7) اتے آرٹیکل 234 دی شق (3) دے مطابق قرارداداں پیش کرݨ کیتے متعلقہ قواعد معطل کیتے ونڄن۔ ایں معاملے تے سپیکر ایوان توں اپوزیشن دے آکھݨ تے ارکان کوں باقاعدہ کھڑا کر تے رائے شماری کروائی تاں تحریک دے حق اچ ایوان دی بھاری اکثریت یعنی 214 ارکان ووٹ ݙتا۔ اے تحریک کثرتِ رائے نال منظور کر گھدی ڳئی جیندے بعد ڈاکٹر طارق فضل چوہدری ایوان اچ قرارداد پیش کیتی جو اسلامی جمہوریہ پاکستان دے دستور دے آرٹیکل 232 دی شق (1) دے ݙوجھے جملہ شرطیہ دے تحت 11 اکتوبر 2026ء کوں صدرِ مملکت کی جانب توں صوبہ خیبر پختونخوا اچ ہنگامی حالت دے اعلان کوں مشترکہ اجلاس اسلامی جمہوریہ پاکستان دے دستور دے آرٹیکل 232 دی شق (7) دے تحت منظور کریندے۔ ݙوجھی قرارداد پیش کریندے ہوئیں وزیرِ پارلیمانی امور ڈاکٹر طارق فضل چوہدری آکھیا جو اسلامی جمہوریہ پاکستان دے دستور دے آرٹیکل 234 دی شق (1) اے تحت 11 اکتوبر 2026ء کوں صدرِ مملکت ولوں صوبہ خیبر پختونخوا اچ ہنگامی حالت دے اعلان کوں مشترکہ اجلاس اسلامی جمہوریہ پاکستان دے دستور دے آرٹیکل 234 دی شق (3) دے تحت منظور کریندے۔ جیندے بعد ایوان اچ انہاں ݙوہائیں قرارداداں تے بحث دا باقاعدہ آغاز تھیا۔ بعد اچ پارلیمنٹ دے مشترکہ اجلاس اچ سپیکر قومی اسمبلی انہاں قرارداداں تے ایوان دی رائے گھدی جیندی ایوان منظوری ݙے ݙتی۔