ضروری شئیں دی ذخیرہ اندوزی، مصنوعی قلت پیدا کرݨ تے زیادہ قیمتاں وصول کرݨ آلیاں دے خلاف سخت کارروائی کیتی ویسی، نائب وزیراعظم

اسلام آباد۔16 اکتوبر (اے پی پی) نائب وزیراعظم و وزیرِ خارجہ سینیٹر محمد اسحاق ڈار آکھیا جو ضروری شیاں دی ذخیرہ اندوزی، مصنوعی قلت پیدا کرݨ تے زیادہ قیمتاں وصول کرݨ آلیاں دے خلاف سخت کارروائی تھیسی۔ جمعہ کوں وزارتِ خارجہ توں جاری بیان دے مطابق نائب وزیراعظم تے وزیرِ خارجہ سینیٹر محمد اسحاق ڈار دی صدارت ضروری اشیائے خورونوش دے ذخائر تے قیمتاں دا جائزہ گھنݨ کیتے کابینہ کمیٹی دا اجلاس تھیا۔ اجلاس اچ وفاقی وزیر برائے قومی غذائی تحفظ و تحقیق، وفاقی وزیرِ موسمیاتی تبدیلی، معاونِ خصوصی برائے وزیراعظم طارق باجوہ، سیکریٹری تجارت تے متعلقہ وفاقی تے صوبائی وزارتاں تے محکمیاں دے سینئر نمائندیاں شرکت کیتی۔ کمیٹی ضروری شیاں دے ذخائر دی صورتحال، فراہمی دے انتظامات تے قیمتاں دا جائزہ گھدا۔ نائب وزیراعظم تے وزیرِ خارجہ کوں ݙسیا ڳیا جو ملکی ضرورتاں پوریاں کرݨ کیتے اشیائے خورونوش دے وافر ذخائر موجود ہن، قلت دا کوئی خدشہ کائنی اتے قیمتاں مستحکم تھیندیاں پئن۔ نائب وزیراعظم تے وزیرِ خارجہ وزیراعظم دی ہدایت دے مطابق ملکی صارفین کوں سہولت فراہم کرݨ کیتے متعلقہ حکام کوں سپلائی چین تے ضروری شیاں دیاں قیمتاں دی مسلسل نگرانی کرݨ دی ہدایت کیتی۔ انہاں آکھیا جو ضروری شئیں دی ذخیرہ اندوزی، مصنوعی قلت پیدا کرݨ تے زیادہ قیمتاں وصول کرݨ آلیاں دے خلاف سخت کارروائی کیتی ویسی۔