دہشت گردی دے معاملے تے دوہری پالیسی نئیں اپنائی ونڄ سڳدی، ایندے تے وفاقی و صوبائی حکومتاں کوں ہکو موقف اپناوݨا ہوسی، وزیرِ داخلہ محسن نقوی

اسلام آباد۔15 اکتوبر(اے پی پی)وفاقی وزیرِ داخلہ سید محسن نقوی آکھیے جو دہشت گردی دے معاملے تے دوہری پالیسی نئیں اپنائی ونڄ سڳدی، ایندے تے وفاقی و صوبائی حکومتاں کوں ہکو موقف اپناوݨا ہوسی، وفاقی حکومت خیبر پختونخوا اچ ایمرجنسی دے نفاذ اا معاملہ باہمی مشاورت نال حل کرݨ دی چھیکڑ تئیں کوشش کیتی ٻھل مذاکرات اچ اتفاق نئیں تھی سڳیا ، مذاکرات ناکام ٻݨاوݨ آلیاں صورتحال ایں نتیجے تے پڄائی اے۔ اے ڳالھ انہاں پارلیمان دے مشترکہ اجلاس اچ خیبر پختونخوا اچ گورنر راج اتے ہنگامی حالت دے نفاذ بارے بحث نمٹیندے آکھی۔ انہاں آکھیا جو نا چاہندے ہوئے اے قدم چاوݨا پئے، ایپکس کمٹی اجلاس اچ حکومت دہشتگردی دے خلاف مشترکہ حکمتِ عملی طے کرݨ، سارے متعلقہ فریقاں کوں ہکو متفقہ موقف اختیار کرݨ دا فیصلہ کیتا اتے ایں سانڳے حتمی پریس ریلیز دا مقصد وی ایہو ہا جو سارے فریق مل تے دہشت گردی دا مقابلہ کرن۔ انہاں آکھیا جو سیکیورٹی اہلکاراں دی شہادت تے سݙݨ دے باوجود وزیراعلیٰ خیبر پختونخوا جنازے کیتے نئیں آئے، ساریان دا اتفاق ہا جو اے جنگ کہیں سیاسی جماعت یا فرد کیتے نئیں ٻھل پاکستان کیتے لڑی ویسی ٻھل اسد قیصر اتے انہاں دی صوبائی حکومت دے موقف اچ فرق ہا، دہشتگردی بارے انہاں دا بیانیہ صرف بیانات تے نا کھڑا ہا ٻھل ایں سانڳے عملی اقدامات اتے صوبائی حکومت دا تعاون وی سامݨے ہا۔ دہشت گردی دے خلاف جنگ اچ صوبائی حکومت آپ قیادت کرݨی ہئی، فوج، فرنٹیئر کور اتے ٻئے سکیورٹی اداریاں کوں وی معاونت ݙیوݨی ہئی ٻھل صوبائی حکومت اے ذمہ داری ڳھنݨ کاں تیار نا ہئی، ہک پاسو سکیورٹی اہلکار شہید تھیندے پئے ہن ٻئے پاسو وزیراعلیٰ انہائیں اہلکاراں دے خلاف تقاریر کریندے ہن۔ دہشتگردی دے خلاف پہلے وی ڳالھ چلدی رہی، بعد اچ صدرِ مملکت، وزیراعظم اتے بلاول بھٹو دے آکھݨ تے مذاکرات کیتے ڳئن، ٻھل لکھ کوشش دے باوجود ڳالھ نئیں بݨی۔ وفاقی وزیرِ داخلہ اے الزام مسترد کر ݙتے جو حکومت دہشتگردی کوں بہانے دے طور تے استعمال کیتے اتے ایمجنسی تے گورنر راج لائے، ایندے کیتے صوبائی حکومت دا رویہ اتے عدم تعاون ہی وڄہ ٻݨیے، مذاکرات کیتے حکومت کوئی دھمکی ݙتی نا زور ݙتے، اختلاف صرف آخری سطر تے ھا جیندے تے اتفاق نئیں تھیا، چھیکڑ تے صوبائی حکومت کوں اے وی تجویز ݙتی گئی جو او انہاں 12 اضلاع اچ آپ ایمرجنسی دا فیصلہ کرے جیندے تے بظاہر اتفاق وی تھیا ہا، دہشتگردی دے معاملے تے وفاق اتے سوبائی حکومت اچ اختلاف نا ہووݨا چاہیدا ہا۔ انہاں آکھیا جو حکومت کݙاھیں نئیں اکھیا جو پاکستان تحریکِ انصاف دہشت گردی اچ ملوث اے، نا ہی کہیں سیاسی جماعت کوں دہشت گردی نال جوڑنا چاہیدے، اعتراض صرف دہشت گردی دے خلاف کارروائیاں اچ تعاون نا کرݨ تے ہا۔ سیاسی موقف اچ اختلاف تھی سڳدے، اپوزیشن ایندی مخالفت وی کر سڳدی اے ٻھل حقائق کوں حقائق دے طور تے ݙیکھݨا چاہیدے، وفاق دی ذمہ داری اے جو او دہشتگردی روکے اتے اساں اے ذمہ داری نٻھیسوں۔ انہاں آکھیا جو بانی پی ٹی آئی نال ملاقاتاں جاری ہن اتے جاری رہ وی سڳدن، ایندے تے حکومت کوں کوئی اعتراض نئیں، ڄیکر پاکستان تحریکِ انصاف دے عہدیدار بااختیار تھی تے آون، مینڈیت واڄح ہووے اتے طے شدہ فیصلیاں تے قائم رہون تاں ہم وی ڳالھ مہاڑ ٹوری ونڄ سڳدی اے، اساں سیاسی مذاکرات کیتے ہر ویلھے تیار ہیں، موجودہ حالات تے کوئی خوش نئیں، اے ݙاݙھی مجبوری اچ قدم چاتے۔