چینی کمپنیاں پاکستان اچ سرمایہ کاری کرن، سانجھے منصوبے ٻݨائے ونڄن، وزیر اعظم شہبا ز شریف دا چینی میڈیا کوں انٹرویو

چین نال اقتصادی، تجارتی تے سرمایہ کاری رابطے ٻئے مضبوط ٻݨاوݨ دا عزم
اسلام آباد۔4جون (اے پی پی) وزیراعظم شہباز شریف چین نال اقتصادی، تجارتی تے سرمایہ کاری رابطے ٻئے مضبوط ٻݨاوݨ دا عزم کریندیں ہوئیں آکھیا جو پاکستان چین دے تجربیاں توں فیدہ چاوݨ چاہندے، سی پیک اعلی معیار دی ترقی دے ݙوجھے مرحلے اچ آڳئے، ݙوہیں ملکاں وچال تعاون نال پاکستان دی سائنسی تے تکنیکی ترقی کوں فروغ ملیے۔ چینی کمپنیاں پاکستان اچ سرمایہ کاری کرن اتے پاکستانی کمپنیاں نال رَل تے سانجھے منصوبے ٻݨاون۔ اے ڳالھیں انہاں چین دے پںج ݙینھ دے سرکاری دورے تے ونجݨ توں پہلے شنہوا نیوز ایجنسی، سی سی ٹی وی اتے سی جی ٹی این اردو سودھے مختلف چینی میڈیا گروپس دے نمائندیاں نال ہک انٹرویو اچ آکھی۔ وزیراعظم آکھیا جو ݙوہیں ملکاں دی کمپنیاں دے آپسی فیدے اتے سرمایہ کاری ودھاوݨ کیتے چین دی کاروباری شخصیات نال ڳالھ مہاڑ نال ݙوپاسہ تعلقات ودھائے ویسن۔ اساں سنجیدہ منصوبیاں نال چین ویندے پئیوں۔ وزیراعظم آکھیا جو ایں دورے نال پاکستان ݙوہیں ملکاں دی کمپنیاں وچال رابطے ودھاوݨ، خصوصی اقتصادی زونز، صنعتاں ٻݨاوݨ اتے سانجھے منصوبیاں نال پاکستان دی افرادی قوت کیتے روزگار دے موقع ݙیوݨ، صنعتاں اتے ٹیکنالوجی دی منتقلی اچ سہولت، پاکستان دی مصنوعات دی پیداوار اچ ودھارے دی امید اے۔ وزیراعظم ڈھانچہ جاتی اتے ادارہ جاتی اصلاحات ، خرچے ڳھٹݨ، صنعتاں دے ودھارے اتے سرمایہ کاراں کیتے سہولتاں ݙیوݨ نال قومی معیشت اچ بہتری ڳھن آوݨ دی حکومتی ترجیحات دا ذکر اے۔ انہاں آکھیا جو پاکستان چین دے تجربیاں توں سکھݨ چاہندے اتے خصوصی اقتصادی زونز ٻݨاوݨ دی خواہش اے۔ انہاں چینی صوبے اتے کمپنیاں کوں دعوت ݙتی جو او خصوصی اقتصادی زونز ٻݨاون اتے آپسی فیدے کیتے پاکستانی کمپنیاں نال سانجھے منصوبے شروع کرن۔