چین دی ترقی اساں ساریاں کیتے مثال اے، پاکستانی کمپنیاں چینی ماڈل اپناون، وزیراعظم شہباز شریف دا شینزن اچ بزنس کانفرنس توں خطاب

شینزن۔5جون (اے پی پی) وزیراعظم محمد شہباز شریف آکھیا جو چین دی ترقی اساں ساریاں کیتے مثال اے، پاکستانی کمپنیاں چینی ماڈل اپناون، چین ترقی کیتے فرسودہ طریقہ کار کوں ترک کر تے جدید طریقے استعمال کیتن، پاکستانی کمپنیاں چینی ماڈل اپناون حکومت تعاون کریسی۔ اساں عہد کریندوں جو قائد اعظم دے وژن تے عمل کر تے پاکستان کوں ترقی ݙیسوں۔ پاکستان توں بے ایمانی اتے سمگلنگ روکݨ کیتے موثر اقدامات اتے ڈھانچہ جاتی تبدیلیاں ڳھدی امدوں، او بدھ کوں چین دے شہر شینزن اچ پاک چین بزنس کانفرنس توں خطاب کریندے پئے ہن۔ ایں موقع تے کانفرنس دے شروع اچ پاکستان اتے چین دے قومی ترانے وڄائے ڳئے۔ ایں موقع تے خطاب کریندیں ہوئیں وزیراعظم شہباز شریف آکھیا جو چین کوں شاندار بزنس کانفرنس کراوݨ تے مبارخ ݙیندوں۔ ݙوہیں ملکاں دی کاروباری شخصیات دی موجودگی ݙوہیں ملکاں وچال تجارتی اتے دوستانہ تعلقات ودھاوݨ دی عکاس اے۔ چینی قیادت دے وژن پاروں اتے شی جن پھنگ دی قیادت اچ چین دنیا دی ݙوجھی وݙی معیشت اتے فوجی قوت اے جیڑھی ہک وݙی کامیابی اے۔ نائب وزیراعظم و وزیر خارجہ محمد اسحاق ڈار آکھیا جو برآمدات اچ ودھارا سودھے ٻئی اقدامات کریندے پئیوں، پاکستان اچ 10 ٹریلین ڈالردے معدنی وسائل دا تخمینہ اے۔ پاکستان اچ آئی ٹی ، زراعت، معدنی وسائل سودھے مختلف شعبیاں اچ موقع ہن۔ انہاں آکھیا جو سرمایہ کاری دی سہولت کونسل کاروباری شعبہ اتے سرمایہ کاراں دی حوصلہ افزائی کیتے کم کریندی پئی اے۔ خسارے اچ چلݨ آلے 84 سرکاری اداریاں دی نجکاری اتے غور جاری اے۔ وزیر خزانہ محمد اورنگزیب آکھیا جو پاکستان دے سارے معاشی اشاریے سدھے پاسے ویندے پئن۔ پاکستان اچ مہانگ ڳھٹ ڳئی اے۔ اساݙے زرمبادلہ دے ذخائر 9 ارب ڈالر توں ودھ ڳئن۔ ایگزیکٹو وائس میئر شینزن تھائو خطاب کریندیں ہوئیں وزیراعظم شہباز شریف دی شینزن آوݨ تے خیر مقدم کریندیں ہوئیں آکھیا جو سانجھے بزنس فورم نال کاروباری شخصیات کوں موثر پلیٹ فارم ملیے۔