پاکستان غیر مساوی ڈیجیٹل ونڈ مکاوݨ سانڳے پرعزم اے، سید یوسف رضا گیلانی

اسلام آباد۔27اگست(اے پی پی) چیئرمین سینیٹ سید یوسف رضا گیلانی آکھیے ساݙے خطے دی 50 فیصد توں ودھ آبادی انٹرنیٹ تئیں رسائی توں محروم اے، غیر مساوی ڈیجیٹل ونڈ پاروں حقیقی ترقی گھنݨ اچ رکاوݨاں آندن ، پاکستان غیر مساوی ڈیجیٹل ونڈ مکاوݨ سانڳے پرعزم اے۔ سینیٹ سیکرٹریٹ موجب اے ڳالھ انھاں ایشیا پیسفک ایڈوانسڈ نیٹ ورک دی 58ویں اجلاس دی افتتاحی تقریب توں خطاب اچ آکھی اے ۔ چیئرمین سینیٹ آکھیے مندوبین دی وݙی تعداد اچ شرکت ساݙی ترقی، خوشحالی ،ٹیکنالوجی، تحقیق اتے اختراع اچ تعاون دے ودھارے اچ مشترکہ عزم دی عکاسی کریندی اے تے اے تقریب ایشیا پیسفک خطے اچ ٹیکنالوجی دی منتقلی کوں ودھارا ، تحقیق اچ سہولت تے علم دے تبادلے اچ پاکستان دی غیر متزلزل لڳن دا ثبوت اے۔ چیئرمین سینیٹ آکھیے ڈیجیٹل انقلاب اچ پاکستان دا ودھدا رجحان قابل تعریف اے اتے چیلنجز اتے مسئلیں نال نبݨݨ سانڳے اجتماعی کوششاں دی لوڑھ اے ۔ چیئرمین سینیٹ سید یوسف رضا گیلانی آکھیے ایشیا پیسفک ایڈوانسڈ نیٹ ورک، ہائر ایجوکیشن کمیشن آف پاکستان اتے پاکستان ایجوکیشن اینڈ ریسرچ نیٹ ورک دی خطے اچ تکنیکی تعاون ودھاوݨ دیاں کوششاں چنڳیاں ہن تے تحقیق، تعلیم تے ٹیکنالوجی اچ مشترکہ اہداف گھنݨ سانڳے ساریں دا اتحاد ویلھے دی لوڑھ اے ، ایں نیٹ ورک توں موسمیاتی تبدیلی، صحت عامہ، غربت، غذائی تحفظ و ٻئے مسئلے حل کرݨ سانڳے حکمت عملی بݨائی ونڄ سڳسی ، ساݙے خطے دی 50 فیصد توں ودھ آبادی حالی وی انٹرنیٹ تئیں رسائی توں محروم اے اتے ایہا وجہ اے جو غیر مساوی ڈیجیٹل ونڈ پاروں حقیقی ترقی گھنݨ اچ رکاوٹاں آندن ۔ پاکستان ایں غیر مساوی ڈیجیٹل ونڈ مکاوݨ سانڳے پرعزم اے ۔ چیئرمین سینیٹ سید یوسف رضا گیلانی آکھیے اے پی اے این  دے تعاون نال تکنیکی ترقی پورے ملک اتے خاص طور تے پسماندہ کمیونٹیز تئیں یقینی بݨائی ویسی جامع اتے ھکو سویں ترقی دی حکمت عملی اپناوݨ نال ہی اساں پورے خطے اچ بامعنی ترقی کرسڳدوں۔ سائبر سکیورٹی دے حوالے نال پاکستان اپݨے ڈیجیٹل انفراسٹرکچر دی حفاظت اتے اہمیت توں چنڳی طرح واقف اے ۔ انھاں آکھیے عالمی سطح تے سائبر سکیورٹی حملیں اچ ودھارا ݙیکھݨ اچ آئے 2023اچ سائبر حملیں اچ 38 فیصد ودھارا تھئے۔ پاکستان سائبر سکیورٹی کوں تکڑا تے مزید فعال بݨاوݨ اچ اقدامات چیندا پئے۔چیئرمین سینیٹ آکھیے پاکستان ڈیجیٹل سپیس اچ وی علاقائی شراکت داراں نال تعاون کریندا پئے اے ایں ڳالھ کوں یقینی بݨاوݨ سانڳے پرعزم اے ساݙی تکنیکی ترقی ماحولیاتی ذمہ واری نال جڑی ہووے۔ اساں گرین ٹیکنالوجیز دی تحقیق اتے انھاں تے عملدرآمد کرݨ اچ ساریں توں اڳوں ہیسے تے پاکستان دی پارلیمنٹ خاص طور تے سینیٹ، قومی وتکنیکی ترقی اڳوں ودھاوݨ سانڳے پرعزم اےساݙی توجہ ایجھیاں پالیسیاں بݨاوݨ تے ہے جیڑھی جدت ودھاوݨ تے ڈیجیٹل انفراسٹرکچر دی تعمیر کریندن ۔ سید یوسف رضا گیلانی آکھیے سینیٹ قانون سازی دے ذریعے ڈیجیٹل تبدیلی کوں سوکھا بماعے تے ایں قانون سازی نال آئی سی ٹی سیکٹر دی ترقی ، سائبر سکیورٹی اتے جدت دی حوصلہ افزائی اچ بہتری آئی اے ۔چیئرمین سینیٹ آکھیے سینیٹ آف پاکستان خود سینیٹ سیکرٹریٹ دے اندر ڈیجیٹل تبدیلی اپناوݨ سانڳے کوشاں اے تے پیپر فری چیمبر بݨاݨ تے سارے عمل کوں ڈیجیٹلائیزکرݨ سانڳے اقدامات چاتے ویندے پئن ۔ انھاں اقدامات پاروں سینیٹ کم زیادہ شفاف، موثر تے قابل رسائی تھی ویسی تے سینیٹ دی ساریاں سرگرمیاں مکمل طور تے ڈیجیٹلائیزڈ تھی ویسن ۔ چیئرمین سینیٹ سید یوسف رضا گیلانی آکھیے پاکستان دی 64فیصد آبادی نینگراں دی ہے نینگر ٹیکنالوجی، تحقیق اتے اختراع اچ معاشی ترقی دے ودھارے سانڳے بے پناہ وسائل دی نمائندگی کریندن ۔چیئرمین سینیٹ آکھیے پاکستان پہلے ہی 20 لکھ توں زیادہ فری لانسرز نال عالمی فری لانس اکانومی اچ اہم شراکت دار اے۔ پاکستان فری لانسرز اتے کاروباری لوکاں دی عالمی سطح تے رسائی ودھاوݨ سانڳے پرعزم اے