وفاقی وزیرریاض پیرزادہ نال رکنِ قومی اسمبلی ملک منیر اقبال چنڑ دی ملاقات

اسلام آباد۔13 اکتوبر (اے پی پی) وفاقی وزیر ہاؤسنگ اینڈ ورکس میاں ریاض حسین پیرزادہ نال حلقہ این اے 168 بہاولپور توں رکنِ قومی اسمبلی منتخب تھیوݨ آلے ملک منیر اقبال چنڑ اپݨے بھرا تے ڈپٹی سپیکر پنجاب اسمبلی ظہیر اقبال چنڑ دے نال انہاں دے دفتر اچ ملاقات کیتی۔ ترجمان موجب ݙوہیں رہنماواں ستمبر 2026ء اچ منعقد تھیوݨ آلے ضمنی انتخابات اچ بھرپور حمایت تے وفاقی وزیر تے انھاں دے اہل خانہ بالخصوص ان دے صاحبزادے دا دلوں شکریہ ادا کیتا۔ ان انتخابات اچ انہاں تقریباً 40 ہزار ووٹاں دی برتری نال شاندار کامیابی حاصل کیتی۔ڈپٹی سپیکر پنجاب اسمبلی وفاقی وزیر دا شکریہ ادا کریندے آکھیے جو انہاں نہ صرف قومی اسمبلی اچ بلکہ انتخابی مہم دے دوران وی بھرپور تعاون کیتا۔ انہاں ایں عزم دا اظہار کیتا جو انتخابی کامیابی عوام دی خدمت سانڳے انہاں دے حوصلے اتے عزم کوں مزید تکڑا بݨیسی۔ وفاقی وزیر میاں ریاض حسین پیرزادہ ݙوہیں رہنماواں کوں کامیابی تے مبارخ ݙیندے ایں کوں بہاولپور کیتے ہک اہم سنگِ میل قرار ݙتا۔ انہاں آکھیا جو اے کامیابی عوام دے اپݨے منتخب نمائندیں تے اعتماد اتے بھروسے دی عکاس اے۔ انہاں ایں عزم دا اعادہ کیتا جو عوامی حمایت انھاں دی ساریں توں وݙی طاقت اے تے او بہاولپور دے عوام دی فلاح و بہبود اتے مفادات دے تحفظ سانڳے اپݨی کوششاں جاری رکھیسن۔ وفاقی وزیر چنڑ خاندان دی طویل سیاسی جدوجہد دا وی ذکر کیتا اتے انہاں دے مرحوم والد کوں خراجِ تحسین پیش کیتا جو رکنِ قومی اسمبلی دی حیثیت نال خدمات انجام ݙیندے وفات پا گئے ہن۔ انہاں مرحوم دی عوامی خدمت اتے اپݨے حلقے دے عوام نال مسلسل وابستگی دی تعریف کیتی۔