رحمان بابا ایکسپریس حادثے دی تحقیقات کرتے ذمہ واراں کوں کیفر کردار تئیں پڄایا ویسے،وفاقی وزیرِریلوے محمد حنیف عباسی

ملتان۔13 اکتوبر (اے پی پی) وفاقی وزیرِ ریلوے محمد حنیف عباسی آکھیے جو رحمان بابا ایکسپریس ریل گاݙی حادثے اچ ہک نکی ٻالڑی سودھے چاربندے شہید تھئن جݙاں جو 30 دے نیڑے زخمی ہن جنہاں اچوں ہک دی حالت تشویشناک اے۔ حادثے دی مکمل تحقیقات کیتیاں ویسن تے جیڑھا وی ذمہ وار پاتا ڳیا، ایں کوں کیفرِ کردار تئیں پڄایا ویسے۔ متاثرین دی مالی امداد وی کیتی ویسے۔وفاقی وزیرِ ریلوے حنیف عباسی ایں موقع تے ڳالھ کریندے آکھیے حادثے دی اطلاع ملدے ہی وزیراعظم محمد شہباز شریف ٹیلی فون تے رابطہ کیتا تے واقعے تے تشویش دا اظہار کیتا۔انہاں آکھیا جو حادثے اچ قیمتی انسانی جاناں دا ضیان ٻہوں افسوسناک اے ، ایں ضیان دا کوئی متبادل کائنی۔ اساں وی ٻالاں آلے ہیسے تے کہیں خاندان دے پیاریں دا وچھوڑا ناقابلِ تلافی نقصان اے۔ حادثہ نہ تھیوݨا چاہیدا ہئی ایندے سارے پہلواں دا جائزہ ڳھدا ویسے۔وفاقی وزیرِ ریلوے آکھیا جو وزیراعظم محمد شہباز شریف حادثے دی تحقیقات کرتے ذمہ واراں دے خلاف کارروائی دی ہدایت کیتی اے، جیڑھا وی ایں واقعے اچ ملوث پاتا ڳیا، ایں دے خلاف قانون موجب کارروائی تھیسی۔ وفاقی وزیرِ ریلوے آکھیا جو پاکستان ریلوے دے ٹریک، ریل گاݙیاں دی ݙیکھ بھال تے مکینیکل نظام کوں بہتر بݨاوݨ کیتے اقدامات کیتے ویندے پئن، وݙے فاصلے دا سفر کرݨ آلیاں ریل گاݙیاں کوں خصوصی طور تے بہتری دے اقدامات اچ شامل کیتا ویندا پئے تاں جو مسافراں کوں محفوظ تے بہتر سفری سہولتاں ݙتیاں ونڄ سڳن۔انہاں آکھیا جو ریلوے کوچز دی بہتری تے وی کم جاری اے تے اڳوں ایجھیاں کوچاں متعارف کراوݨ دی کوشش کیتی ویندی پئی اے جنہاں دے کپ تے ٻئے متعلقہ حصے زیادہ مضبوط ہوون تے حادثیں دی صورت اچ ضیان دا خطرہ گھٹ ہووے ۔ وفاقی وزیرِ ریلوے حادثے دے بعد امدادی کارروائیاں اچ حصہ گھنݨ آلے اداریں کوں خراجِ تحسین پیش کریندے آکھیا جو ضلعی انتظامیہ، پاکستان ریلوے، پاک فوج دے جواناں تے ریسکیو اہلکاراں بھرپور کردار ادا کیتا۔