سیکیورٹی فورسز ژوب اچ خوارجیاں دی پاکستان اچ دراندازی دی کوشش ناکام بݨاݙتی، 5خوارج جہنم واصل

راولپنڈی ۔19جنوری(اے پی پی) سیکیورٹی فورسز ژوب اچ خوارجیاں دی پاکستان اچ دراندازی دی کوشش کوں نا کام بݨیندے 5خوارج کوں جہنم واصل کرݙتے ۔ پاک فوج دے شعبہ تعلقات عامہ ( آئی ایس پی آر) توں جاری پریس ریلیز موجب 18/19 جنوری دی رات خوارج دے ھک گروپ دی نقل و حرکت نوٹ کیتی ڳئی جیڑھے جو پاک افغانستان سرحد دے ذریعے دراندازی دی کوشش کریندے پئے ہن ۔سیکیورٹی فورسز ضلع ژوب دے علاقے سمبازہ اچ خارجیاں دی پاکستان اچ دراندازی دی کوشش کوں مؤثر طریقے نال ناکام بݨیندے پنج خوارج کوں جہنم واصل کرݙتا ۔ پاکستان کئی واری افغان عبوری حکومت کوں سرحد تے موثر انتظام کرݨ دا آکھ چکیے ،امید اے افغان عبوری حکومت ایں حوالے نال آپݨی ذمہ واریاں پوری کریسی تے خوارج دی طرفوں پاکستان دے خلاف دہشت گردی سانڳے افغان سرزمین دے استعمال دی اجازت نہ ݙیسی۔آئی ایس پی آر موجب پاکستان دی سیکیورٹی فورسز دہشت گردی دی لعنت کوں منڈھوں مکاوݨ تے سرحداں کوں محفوظ بݨاوݨ سانڳے پرعزم اے۔