حج 2025 دی تیاری اچ کہیں قسم دی لاپرواہی برداشت نہ کیتی ویسی ، معاونین دے انتخاب اچ شفافیت تے میرٹ کوں ملحوظ خاطر رکھیا ونڄے ، وزیراعظم

اسلام آباد۔20جنوری(اے پی پی)وزیراعظم محمد شہباز شریف حجاج کرام کوں ہرقسم دی معاونت اتے سہولت دی فراہمی یقینی بݨاوݨ دی ہدایت کریندے آکھیے حج 2025 دی تیاری اچ کہیں قسم دی لاپرواہی برداشت نہ کیتی ویسی ، حجاج کرام سانڳے معاونین دے انتخاب دے طریقہ کار اچ شفافیت اتے میرٹ کوں ملحوظ خاطر رکھیا ونڄے ۔ وزیراعظم آفس دے میڈیا ونگ توں جاری بیان موجب اے ڳالھ وزیراعظم سنوار کوں حج 2025 دی تیاریاں دے سلسلے اچ جائزہ اجلاس دی صدارت کریندے آکھی ۔ اجلاس اچ وفاقی وزرا احد خان چیمہ، چوہدری سالک حسین تے متعلقہ اعلیٰ حکام شرکت کیتی۔اجلاس اچ وزیرِ اعظم کوں حج 2025 دی تیاریاں تے تفصیلی بریفنگ ݙتی ڳئی ۔اجلاس کوں ݙسایا ڳئے جو گزریل سال وانڳوں اڄوکے سال وی حجاج کرام کوں سمز دی فراہمی پاکستان توں کیتی ویسی تے حاجیاں دی معاونت سانڳے حج موبائل ایپلی کیشن وی فعال اے۔ اجلاس کوں حج فنڈ تے پیشرفت دا ݙسیندے ݙسایا ڳئے جو ایں تے کم چھیکڑی مرحلے اچ ہے ۔ اجلاس اچ وزیراعظم آکھیے حج 2025 دی تیاری اچ کہیں قسم دی لاپرواہی قبول کائنی۔حج 2025 اچ حجاج کرام کوں ہر قسم دی معاونت و سہولت یقینی بݨائی ونڄے ۔حج 2025 دی تیاریاں دے حوالے نال ھک جامع بریفنگ تیار کرتے آندے کجھ ݙینھ اچ پیش کیتی ونڄے ۔ حجاج کرام کوں حج 2025 دے حوالے نال تربیت دیاں بہترین سہولتاں ݙتیاں ونڄن ۔ وزیرِ اعظم حج ڈیوٹی تے چنڳی شہرت دے قابل افسران تعینات کرݨ دی ہدایت کیتی ۔ وزیراعظم آکھیے حجاج کرام اللہ دے مہمان ہن، حکومت دی طرفوں انہاں دی خدمت تے معاونت اچ کہیں قسم دی لاپرواہی قبول نہ کریساں ۔وزیراعظم ہدایت کیتی جو حجاج کرام دی رہائش، سفری تے ٻئی سہولتاں دا خاص خیال رکھیا ونڄے ۔حجاج کرام سانڳے معاونین دے انتخاب دے طریقہ کاراچ شفافیت تے میرٹ کوں ملحوظِ خاطر رکھیا ونڄے