وزیراعظم دی سی ڈی اے کوں جوائنٹ وینچر تے پبلک پرائیویٹ پارٹنرشپ دے ذریعے جدید سہولتاں توں آراستہ ہوٹلاں دی تعمیر سانڳے جامع رپورٹ پیش کرݨ دی ہدایت

اسلام آباد۔20جنوری(اے پی پی) وزیراعظم محمد شہباز شریف سی ڈی اے کوں جوائنٹ وینچر تے پبلک پرائیویٹ پارٹنرشپ دے ذریعے جدید سہولتاں توں آراستہ نویں ہوٹلاں دی تعمیر سانڳے جامع رپورٹ پیش کرݨ دی ہدایت کریندے آکھیے پاکستان اچ بین الاقوامی کانفرنساں تے ٻیاں سرگرمیاں دے انعقاد سانڳے ہوٹلاں، ہسپتالاں اتے ٻیاں سہولتاں کوں مزید بہتر بݨاوݨ دی لوڑھ اے ۔ وزیراعظم آفس دے میڈیا ونگ توں جاری بیان موجب وزیراعظم محمد شہباز شریف دی زیر صدارت سی ڈی اے دے امور دے حوالے نال جائزہ اجلاس منعقد تھئے ۔ وزیراعظم اسلام آباد اچ اڄوکے حالیہ بین الاقوامی کانفرنساں اتے ٻئی تقریبات دے کامیاب انعقاد دے حوالے نال سی ڈی اے دی کارکردگی دی تعریف کیتی ۔ وزیراعظم آکھیے پاکستان اچ بین الاقوامی کانفرنساں دا آغاز سفارتی محاذ تے ساݙی کامیابی دی سند اے، مسلسل محنت نال دوست ملکاں دا پاکستان تے اعتماد بحال تھئے۔ انہاں آکھیے پاکستان اچ بین الاقوامی سطح دی کانفرنساں اتے ٻیاں سرگرمیاں دے انعقاد سانڳے ہوٹلاں، ہسپتالاں اتے بیاں سہولتاں بہتر بݨاوݨ دی لوڑھ اے ، جدید سہولتاں دی فراہمی توں ملک اچ سیاحت کوں ودھارا ملسی ۔ وزیراعظم سی ڈی اے کوں ہدایت کیتی جو جوائنٹ وینچر تے پبلک پرائیویٹ پارٹنرشپ دے ذریعے جدید سہولتاں توں آراستہ نویں ہوٹلاں دی تعمیر سانڳے جامع رپورٹ پیش کیتی ونڄے ، دوست ملکاں توں آوݨ آلے مہماناں سانڳے بین الاقوامی معیار دی سہولتاں دی فراہمی یقینی بݨائی ونڄے ۔ وزیراعظم سی ڈی اے کوں اسلام آباد دے رہائشیاں سانڳے سہولتاں مزید بہتر بݨاوݨ دی ہدایت کیتی ۔ وزیراعظم کوں ݙسایا ڳئے جو اسلام آباد اچ غیر فعال قیمتی سرکاری عمارتاں دی بحالی تے نویں ہوٹلاں دی تعمیر دے حوالے نال پری۔فزیبلٹی رپورٹس تیار تھی چکئن ۔ اجلاس اچ وفاقی وزیر اقتصادی امور احد خان چیمہ، چیئرمین سی ڈی اے اتے متعلقہ اداریں دے اعلیٰ افسر شریک تھئن