نیوگوادر انٹرنیشنل ایئرپورٹ ملکی معیشت اچ تبدیلی دا باعث ہوسی، گوادر ترقی دی راہ تے گامزن اے، خواجہ محمد آصف

گوادر۔20جنوری(اے پی پی) وزیر دفاع و ہوا بازی خواجہ محمد آصف آکھیے نیوگوادر انٹرنیشنل ایئرپورٹ ملکی معیشت اچ تبدیلی دا باعث ہوسی،پاکستان دی ہوا بازی دی تاریخ اچ اے ھک اہم موقع اے ، سی پیک اچ شمولیت دے بعد گوادر ترقی دے رستے تے گامزن اے ، تجارت اتے سیاحت دے ودھارے سانڳے گوادر اہم کردار ادا کریسی ، اے منصوبہ عظیم کامیابیاں دی ھک منفرد مثال اے جیں تے ساریں کوں ماݨ اے ۔ اے ڳالھ انہاں نیو گوادرانٹرنیشنل ایئرپور ٹ دی آپریشن لائزیشن دے موقع تے منعقدہ تقریب توں خطاب کریندے آکھی ۔ ایندے توں پہلے وزیر دفاع و ہوا بازی پی آئی اے دی پہلی پروازدے ذریعے گوادر پڄݨ آلے مسافراں دا پرتپاک استقبال کیتے۔گورنر بلوچستان جعفر خان مندوخیل،وزیر اعلیٰ بلوچستان میر سرفراز بگٹی دے رلے وزیر دفاع و ہوابازی خواجہ محمد آصف مسافراں کوں پھل پیش کیتے۔ استقبال دے بعد ھک پروقار تقریب توں خطاب کریندے خواجہ محمد آصف آکھیے نیو گوادربین الاقوامی ہوائی اݙے دی آپریشنلائزیشن دا موقع نہ صرف پاکستان دی ہوا بازی دی تاریخ اچ اہم سنگ میل دی حیثیت رکھیندے بلکہ ساݙے ملک دی ترقی تے پیشرفت دے عزم کوں وی ظاہر کریندے ۔ نیو گوادربین الاقوامی ہوائی اݙے دی تاریخ چین پاکستان اقتصادی راہداری (سی پیک )اچ شمولیت دے نال 15-2014 نال شروع تھئی ، سی پیک دے بانیاں گوادر دے علاقائی رابطے تے اقتصادی ترقی دے کردار کوں منیندے ہوئیں ایں جدید ہوائی اݙےدے قیام کوں ترجیح ݙتی تاں جو پاکستان تے دنیا وچال ھک اہم رابطہ ݙتا ونڄ سڳے ، نیوگوادر ہوائی اڈےدی تعمیر، انجینئرنگ اتے تعاون دا ھک عظیم کارنامہ اے۔وزیر دفاع و ہوا بازی خواجہ محمد آصف آکھیے اساکوں ایں سوہݨے تحفے سانڳے چینی حکومت دا شکریہ ادا کرݨا چاہیدے جنہاں ایں سوہݨے تحفے سانڳے پاکستان پاکستان، بالخصوص بلوچستان دے عوام کوں بلا تعطل حمایت کیتی۔ انہاں آکھیے اڄ ایں جدید منصوبے دی آپریشنلائزیشن دا مشاہدہ کریندوں جنہاں ایندی تکمیل اچ حصہ ڳھدا۔ منصوبے دی ٹیماں، انجینئرز، معمار ، مزدور تے سارے شرکا مثالی ، پیشہ وارانہ رویے اتے عزم دامظاہرہ کیتے۔ انہاں دی محنت نہ صرف ھک ہوائی اݙا بݨائے بلکہ مستقبل دی امید تے ترقی دا نشان وی تعمیر کیتے ، انہاں آکھیے منصوبے اچ حصہ گھنݨ آلے لوکاں دی عظیم کامیاباں تے کوششاں دی تعریف کریندے آکھیے اساں رل تے ھک خواب کوں حقیقت اچ بدالیے تے رل تے پاکستان سانڳے ھک روشن تے خوشحال مستقبل دی تعمیر جاری رکھیسوں۔