وفاق تے صوبیں دے تعاون نال ہی پولیو مکاوݨ ممکن تھیسی ، وزیراعظم شہباز شریف

اسلام آباد۔5مارچ(اے پی پی) وزیراعظم محمد شہباز شریف ملک توں پولیو منڈھوں مکاوݨ دا عزم کریندے آکھیے وفاق تے صوبیں دے تعاون نال ہی پولیو منڈھوں مُکسی ۔ وزیراعظم میڈیا دفتر توں جاری بیان موجب انہاں اے ڳالھ انسدادِ پولیو مہم دے حوالے نال جائزہ اجلاس دی صدارت کریندے آکھی ۔ اجلاس اچ وزیر مملکت ڈاکٹر مختار بھرت، سینیٹر عائشہ رضا فاروق تے متعلقہ اداریں دے اعلیٰ افسراں شرکت کیتی ۔وزیراعظم پولیو کیسز دی وختی شناخت اتے انہاں اچ منفی رجحان سانڳے سارے صوبیں دی انتظامیہ دی پذیرائی کیتی۔ وزیراعظم آکھیے فروری 2025ء اچ پولیو کیسز اچ منفی رجحان انسداد پولیو مہم دے مؤثر ہووݨ دی سند اے، اساں پولیو مکاوݨ سانڳے پرعزم ہیسے،پولیو کیسزاچ بتدریج کمی سارے صوبیں دی انتظامیہ دی ودھ ساری محنت پاروں ممکن تھئی ۔وزیراعظم پولیو مہم دے دوران سکیورٹی فورسز دے تعاون دی تعریف کیتی تے پولیو دے سارے ڈیٹا کوں ڈیجیٹائز کرݨ تے سخت مانیٹرنگ دی ہدایت کیتی۔ اجلاس اچ وزیراعظم کوں انسدادِ پولیو مہم دی ہݨ تئیں دی پیشرفت دے حوالے نال ݙسایا ڳئے۔ وزیراعظم کوں ݙسایا ڳئے جو سارے صوبیں اچ انسداد پولیو مہم جاری اے ،فروری 2025 دی مہم دے دوران 42.5 ملین ٻالاں کوں پولیو دے قطرے پلائے ڳئن، پولیو توں متاثرہ ضلعیں اچ ٻالاں دی تقریبا 90 فیصد آبادی کوں پولیو دے قطرے پلائے ڳئن ،سال 2025 دے آغاز توں ہݨ تعیں 6 پولیو کیسز سامݨے آئن ، فروری 2025 دی انسددا پولیو مہم دے شروع توں ہݨ تئیں پولیو توں متاثرہ ضلعے خصوصاًبلوچستان، سندھ اتے جنوبی خیبر پختونخوا اچ پولیو کیسزاچ واضح کمی ݙیکھݨ اچ آئی اے ۔ اڄوکے سال دے پہلے 6 مہینے اچ ترائے پولیو مہم پلان دا حصہ ہن جنہاں اچوں پہلی مہم فروری اچ تھی چکی اے جݙاں جو ٻئے 2 اپریل تےمئی دے مہینے اچ تھیسن ۔آئی ٹی ڈیش بورڈ دے ذریعے پولیو مہم دے سارے پہلوواں دی مستقل نگرانی کیتی ویندی پئی اے