ایم ٹی آنر 25 دے پاکستانی عملے دے ٻئے 3 ارکان وطن واپسی کیتے روانہ، دفترِ خارجہ تے حکومت بحفاظت وطن واپسی یقینی بݨاوݨ کیتے ہر ممکن کوشش کیتی، نائب وزیراعظم اسحاق ڈار

اسلام آباد۔7 اکتوبر (اے پی پی) نائب وزیراعظم و وزیرِ خارجہ سینیٹر محمد اسحاق ڈار آکھیا جو صومالیہ دے ساحل دے قریب ہائی جیک تھیوݨ آلے ایم ٹی آنر 25 دے پاکستانی عملے دے باقی 3 ارکان وی اج ادیس ابابا توں بحفاظت کراچی واپس پڄݨ کیتے روانہ تھیندے پئن۔ بدھ کوں سماجی رابطے دی ویب سائٹ ’’ایکس‘‘ تے آپݨی پوسٹ اچ نائب وزیراعظم آکھیا جو ایم ٹی آنر 25 دے پاکستانی عملے دے باقی ارکان عمران علی، حسین یوسف تے محمد یاسین اج ادیس ابابا توں بحفاظت کراچی واپسی کیتے روانہ تھیندے پئے ہن اتے او آپݨے ٹٻر ہ نال ول ملسن۔ انہاں آکھیا جو ادیس ابابا اچ پاکستان دے سفیر ترائے ارکان نال ملاقات کیتی اتے ادیس ابابا اچ قیام وچال انہاں کوں تمام ضروری سہولیات تے خدمات دی فراہمی یقینی بݨائی۔ اسحاق ڈار آکھیا جو دفترِ خارجہ تے حکومتِ پاکستان وزیراعظم محمد شہباز شریف دی قیادت اچ پاکستانی عملے دے تمام ارکان دی بحفاظت وطن واپسی یقینی بݨاوݨ کیتے ہر ممکن کوشش کیتی۔ انہاں انہاں کوشساں اچ تعاون کرݨ آلے سارے لوکاں دا شکریہ ادا کیتا۔ نائب وزیراعظم آکھیا جو اگرچہ اساں آپݨے لوکاں دی بحفاظت واپسی تے خوش ہیسے، تاہم پاکستانی عملے دے 3 ارکان دے جاں بحق تھیوݨ تے اساکوں ݙکھ اے۔ انہاں دعا کیتی جو اللہ تعالیٰ انہاں دی مغفرت فرماوے تے انہاں دے اہل خانہ کوں صبر تے استقامت ݙیوے۔ انہاں آکھیا جو پاکستان بحری قزاقی دے خلاف کارروائی تے سمندری عملے تے بحری رستیاں دی حفاظت تے سلامتی یقینی بݨاوݨ کیتے بین الاقوامی شراکت داراں نال رل تے کم کرݨ دے عزم تے قائم اے۔