سکیورٹی فورسز بنوں کینٹ اچ بزدلانہ دہشت گردی دا حملہ ناکام ٻݨا ݙتے، چار خودکش حملہ آوراں سودھے 16 دہشت گرد جہنم واصل، فائرنگ دے تبادلے اچ پاک فوج دے چار جواناں سودھے 17 بندے شہید اتے 32 زخمی

راولپنڈی۔5مارچ (اے پی پی) سکیورٹی فورسز بنوں کینٹ اچ بزدلانہ دہشت گردی دا حملہ ناکام ٻݨا ݙتے، چار خودکش حملہ آوراں سودھے 16 دہشت گرد جہنم واصل، فائرنگ دے تبادلے اچ پاک فوج دے چار جواناں سودھے 17 بندے شہید اتے 32 زخمی تھین۔ آئی ایس پی آر موجب 4 مارچ کوں خوارج عناصر ولوں بنوں کینٹ تے بزدلانہ دہشت گرد حملے دی کوشش کیتی ڳئی۔ حملہ آوراں کینٹ دی سکیورٹی اچ دراندازی دی کوشش کیتی جڈانجو پاکستان دی جری سکیورٹی فورسز انہاں دے ناپاک عزائم کوں فوری اتے فیصلہ کن کاروائی نال ناکام ٻݨا ݙتے۔ مایوسی دے عالم اچ حملہ آوراں بارود نال بھری ݙوڳاݙیاں کینٹ دی حفاظتی کندھ نال ٹکرا ݙتی۔ پاک فوج دے بہادر جواناں بے مثال جرات اتے پیشہ وارانہ مہارت ݙکھا تے حملہ آوراں دا موثر انداز اچ مقابلہ کیتا اتے چار خودکش بمباراں سودھے سارے سولہاں دہشت گرداں کوں جہنم واصل کر ݙتے۔ ایں شدید جھڑپ اچ پںج دلیر سپاہیاں بہادری نال لڑدیں ہوئیں شہید تھی ڳئے۔ افسوسناک طور تے ہک مسیت اتے ہک رہائشی عمارت وی متاثر تھئی جئیں اچ 13 بے گناہ شہری شہید اتے 32 زخمی تھی ڳئے۔ انٹیلی جنس رپورٹس ایں گھناؤنے حملے اچ افغان شہریاں دی براہ راست ملوث ہووݨ دی تصدیق کر ݙتی اے جڈانجو ثبوتاں توں ثابت تھیے جو حملے دی منصوبہ بندی اتے نگرانی افغانستان اچ موجود خوارج سرغناں کیتی۔ آئی ایس پی آر آکھیا جو پاکستان عبوری افغان حکومت توں توقع رکھیندے جو او آپݨی ذمہ واریاں پورا کریندیں ہوئیں آپݨی سرزمین کوں پاکستان دے خلاف دہشت گردی کیتے استعمال تھیوݨ توں روکن۔ پاکستان دی سیکیورٹی فورسز ہر قسم دی دہشت گردی دے خاتمے کیتے پرعزم اے۔ اساݙے بہادر جوان اتے معصوم شہریاں دی قربانیاں ایندا ثٻوت ہن جو اساں آپݨی سرزمین دے تحفظ کیتے کہیں وی قیمت تے پچھوں نہ ہٹسوں۔