صنفی مساوات تے تریمتاں کوں بااختیار بݨاوݨ سانڳے پرعزم ہیسے،تریمتاں دے حقوق یقینی بݨاوݨ ساݙا مشن اے ، وزیراعظم شہباز شریف

اسلام آباد۔8مارچ(اے پی پی) وزیراعظم محمد شہباز شریف صنفی مساوات دے عزم دا اعادہ کریندے آکھیے تریمتاں کوں تعلیم، ہنرمندی تے روزگار دے موقع تئیں ھکو سویں رسائی ݙے تے ہی انہاں کوں بااختیار بݨایا ونڄ سڳدے، تریمتاں دے حقوق یقینی بݨاوݨ ساݙا مشن اے تے غیر متزلزل عزم اے۔ انہاں اے ڳالھ تریمتاں دے جگ ݙیھاڑ تے منعقدہ تقریب توں خطاب کریندے آکھی ۔ مختلف شعبیں توں تعلق رکھݨ آلی ممتازتریمتاں بشمول کابینہ ارکان ، قانون سازاں، عہدیداراں، کاروباری شخصیات اتے کارکنان وزیراعظم ہاؤس اچ تھیوݨ آلی ایں تقریب اچ شرکت کیتی جیں دا اہتمام وزارت انسانی حقوق تے قومی کمیشن برائے حیثیت نسواں اقوام متحدہ دے پاپولیشن فنڈ دے تعاون نال کیتا ہئی ۔ وزیراعظم ایں موقع تے قومی کمیشن برائے حیثیت نسواں اتے اقوام متحدہ پاپولیشن فنڈ دی تیار کیتی ڳئی دارالحکومت سانڳے صنفی مساوات دے حوالے نال پہلی رپورٹ وی لانچ کیتی جیڑھی جو تعلیم، صحت، گورننس، سیاسی نمائندگی اتے انصاف جیھے اہم شعبیں اچ چیلنج دی نشاندہی تے انھاں دے حل دی سفارش کریندی اے ۔وزیراعظم شہباز شریف آکھیے انہاں دی حکومت قومی معیشت اچ کردار نبھاوݨ آلے پروگراماں اچ تریمتاں دی شمولیت کوں ودھارا ݙیوݨ سانڳے اجتماعی اقدام کیتے صوبیں نال اشتراک کار کریسی ۔انہاں ورکنگ ویمنز انڈومنٹ فنڈ بݨاوݨ دا اعلان کیتے تاں جو کم کرݨ آلیاں تریمتاں دی مدد کیتی ونڄ سڳے تے انہاں کوں عصری چیلنجز دا مقابلہ کرݨ اچ مدد ملے۔ انہاں وزیر اعظم دے تریمتاں کوں بااختیار بݨاوݨ دے پیکیج کوں ملازمت دے شعبیں اچ تریمتاں نال امتیازی سلوک مکاوݨ تے مرداں دے مساوی سہولتاں یقینی بݨاوݨ سانڳے خصوصی انتظامات کرݨ کیتے ھک انقلابی قدم قرارݙتے ۔ انہاں آکھیے ھکو سویں موقع ݙیوݨ نال ساݙی پنجاہ فیصد تریمتاں دی آبادی کوں ھک مفید افرادی قوت اچ بدالیا ونڄ سڳدے ۔ انہاں ملازمت کرݨ آلیاں تریمتاں دی سہولت سانقے ایں ڳالھ کوں اجاگر کیتے جو اسلام آباد اچ سرکاری تے نجی محکمیں اچ ڈے کیئر سینٹرز بݨائے ڳئن جنہاں اچ سہولتاں دے دائرہ کار کوں مزید وسعت ݙیوݨ دا منصوبہ اے ۔ وزیر اعظم ایں امر تے افسوس کیتے جو ملک اچ اعلیٰ تعلیم یافتہ تریمتاں دی ھک وݙی تعداد کم تے خانداناں اچ توازن پیدا کرݨ دی جدوجہد اچ پیشہ ورانہ کیریئر چھوڑ ݙیندن جیں دے نتیجے اچ ہنر مند انسانی وسائل دا ٻہوں وݙا ضیان تھیندے ۔ انہاں آکھیے تعلیم یافتہ تریمتاں دے ایں طبقے سانڳے میݙا سنھیا اے جو او اڳوں آون تے آپݨی مہارت دے حامل اسپتالاں، بینکاں اتے ٻئے پیشیں اچ رلن تاں جو قومی معیشت اچ مثبت کردار نبھا سڳن ۔ وزیراعظم شہباز شریف ملک دی انھاں ممتاز تریمتاں کوں خراج تحسین پیش کیتے جنہاں تریمتاں کوں بااختیار بݨاوݨ دے منظر نامے دی تشکیل اچ چنڳاں کردار نبھائے۔ ایں سلسلے اچ انہاں خاص طور تے تحریک پاکستان دی سرکردہ تریمتاں محترمہ فاطمہ جناح اتے بیگم رعنا لیاقت علی خان، پاکستان اتے مسلم دنیا دی پہلی تریمت وزیراعظم بینظیربھٹو،آمریت دے خلاف مزاحمت کرݨ آلی مثالی شخصیات بیگم نصرت بھٹو اتے بیگم کلثوم نواز ، سماجی کارکنان بلقیس ایدھی تے ڈاکٹر روتھ فائو ، قانون دان عاصمہ جہانگیر ، ملک دی گھٹ عمر آئی ٹی ماہر ارفع کریم، سابق سپیکر قومی اسمبلی ڈاکٹر فہمیدہ مرزا، پنجاب دی پہلی تریمت وزیر اعلیٰ مریم نواز، لاہور ہائی کورٹ دی پہلی تریمت چیف جسٹس عالیہ نیلم اتے سپریم کورٹ دی پہلی تریمت جج جسٹس عائشہ ملک دا ذکر کیتا۔انہاں آکھیے قوم دیاں دے دھیریں تریمتاں کوں بااختیار بݨاوݨ دی ھک قابل ذکر علامت ہن جنہاں آپݨے شعبیں اچ آپݨی شناخت بݨائی ۔شہباز شریف اپݨی پارٹی دے ابتدائی دور حکومت اچ تریمتاں دی خودمختاری سانڳے چاتے ڳئے اقدامات دا ذکر کیتے جنہاں اچ تریمتاں سانڳے پنجاب دے پہلے انسداد تشدد مراکز دا قیام، سرکاری محکمیں دے بورڈز اچ تریمتاں دے کوٹہ اچ ودھارا ، طالبات سانڳے وظیفے اچ ودھارا تے 90 ہزار ٻالڑیاں کوں سکولاں اچ داخل کرتے سلھاں دے بٹھے تے چائلڈ لیبر دا خاتمہ شامل اے۔ ایں موقع تے وزیر قانون، انصاف اتے انسانی حقوق اعظم نذیر تارڑ آکھیے وزیراعظم شہباز شریف دی ہدایت موجب وزارتاں تے محکمیں کوں تریمتاں دی رلت دی حامل پالیسیاں یقینی بݨاوݨ سانڳے گزریل سال ٹاسک ݙتا ڳیا ہئی ۔ انہاں آکھیے اے اقدام کامیابی نال محکمانہ بورڈز اچ تریمتاں دی نمائندگی دے زیادہ تناسب دا باعث بݨیے۔ اقوام متحدہ دے ریذیڈنٹ کوآرڈینیٹر محمد یحییٰ آکھیے اقوام متحدہ صنفی ایکشن پلان متعلق پائیدار ترقی دے اہداف 2030 گھنݨ سانڳے پاکستان دی معاونت کیتے پرعزم اے۔ صنفی مساوات کوں تریمتاں دے مخصوص حوالے دے طور تے نی بلکہ ھک انسانی مسئلے دے طور تے منݨ دی لوڑھ اے ۔ انہاں آکھیے اسلام آباد دی صنفی برابری دی رپورٹ دا اجراء انھاں چیلنجزدی نشاندہی کرݨ اچ اہم اے جنہاں تے مزید توجہ ݙیوݨ دی لوڑھ اے ۔ صنفی مین اسٹریمنگ دی خصوصی کمیٹی دی چیئرپرسن ڈاکٹر نفیسہ شاہ آکھیے مختلف سرکاری اداریں اتے محکمیں اچ تریمتاں دی نمائندگی 33 فیصد دے ہدف توں گھت اے انہاں آکھے انہاں دی نمائندگی موثر حکمرانی اتے بہتر پالیسی سازی کیتے ضروری اے۔چیئرپرسن این سی ایس ڈبلیو ام لیلیٰ اظہر پاکستان دی صنفی مساوات دی صورتحال تے ڳالھ کریندے آکھیے تریمتاں ٻہوں سارے شعبیں اچ رکاوٹاں پار کریندیاں پئن ۔ انہاں تریمتاں کوں بااختیار بݨاوݨ دے اقدامات دے طور تے خصوصی طور تے تریمت مسافراں کیتے پنک بساں دے اجراء اتے ’ویمن آن وہیلز‘ پروجیکٹ تے روشنی پاتی جیں تریمتاں کوں سوکھی تے تے آزادانہ نقل و حرکت کیتے سہولت ݙتی۔ ایں موقع تے چیئرمین سیکیورٹی ایکسچینج کمیشن آف پاکستان (ایس ای سی پی) عاکف سعید آکھیے وزیراعظم دے تریمتاں کوں بااختیار بݨاوݨ دے پیکیج دے تحت ایس ای سی پی کوں انہاں پرائیویٹ کمپنیاں کوں نامزد کرݨ دا کم ݙتا ڳئے جنہاں آپݨے کم دی جاہ تے فیملی فرینڈلی پالیسیاں نافذ کیتن۔ وزیراعظم 10 بہترین نجی کمپنیاں کوں فیملی فرینڈلی ایوارڈز ݙتے جنہاں اچ الفا بیٹا کور سلوشنز، ارفع کریم ٹیکنالوجی انکیوبیٹر، ایوی ایشن ایم آر او، بلنک کیپٹل، فنورکس گلوبل، گفٹ ایجوکیشنل، کِسٹ پے، لائبہ انٹرپرائزز، لیڈیز فنڈ انرجی، اتے لی اینڈ فنگ پاکستان شامل ہن۔اے ایوارڈز ھک آن لائن سروے اتے اسکورنگ میٹرکس تے مبنی ہن جیڑھے جو ایس ای سی پی یو این ویمن اتے پاکستان بزنس کونسل دے تعاون نال تیار کیتا ہئی ۔ 2024 اچ شروع کیتے ڳئے سروے اچ 230 توں ودھ کمپنیاں حصہ ڳھدا جنہاں اچوں 10 کوں شفاف عمل دے ذریعے شارٹ لسٹ کیتا ڳئے۔