سی ٹی ڈی کالعدم تنظیماں دے 10دہشتگرداں کوں گرفتار کرڳھدے

لاہور۔8مارچ(اے پی پی) کائونٹر ٹیررازم ڈیپارٹمنٹ (سی ٹی ڈی) پنجاب دے مختلف علاقیں اچ کاروائیاں کرتے کالعدم تنظیم نال تعلق رکھݨ آلے 10دہشتگرداں کوں گرفتار کرتے دہشت گردی دا وݙا منصوبہ ناکام بݨا ݙتے جݙاں جو خوشاب اتے راولپنڈی توں ٹی ٹی پی دے ݙو خطرناک دہشتگرداں کوں بارودی مواد سودھے گرفتار کرڳھدے ۔ ترجمان موجب سی ٹی ڈی پنجاب دہشت گردی دے کہیں وی ناخوشگوار واقعے نال نبݨݨ سانڳے صوبے دے مختلف ضلعیں اچ انٹیلی جنس تے مبنی 73کارروائیاں کیتن جہاں اچ 73مشتبہ لوکاں توں پچھ ڳچھ کیتی ڳئی تے 10دہشت گرداں کوں اسلحہ، دھماکہ خیز مواد اتے ٻئے ممنوعہ مواد سودھے گرفتار کرڳھدے۔ گرفتار دہشت گرداں اچ ریاض، شفیق ،رشید، ظہیرالدین، حفیظ، آصف اتے وحید شامل ہن۔ انہاں آکھیے دہشت گرداں دا تعلق فتنہ خوارج تے ٻئی تنظیماں توں اے ۔ترجمان ݙسائے جو انہاں دہشت گرداں دی گرفتاری راولپنڈی ،ٹوبہ ٹیک سنگھ ،خوشاب ،بہاولنگر، رحیم یارخان، راجن پور، جہلم تے بھکر اچ انٹیلی جنس بیسڈ آپریشنز تے عمل اچ آئی جݙاں جو انہاں دہشتگرداں توں 2690گرام دھماکہ خیز مواد، ڈیٹونیٹرز 19، سیفٹی فیوز وائر 35 فٹ،ھک آئی ای ڈی بم ،کالعدم تنظیم دے پمفلٹ ، میگزین، موبائل فون اتے نقدی وی برآمد کرڳھدی ڳئی اے۔ ترجمان آکھیے دہشتگرداں لاہور اتے ٻئے شہراں اچ اہم عمارتاں کوں ٹارگٹ کرݨ دا منصوبہ بݨا رکھیا ہئی ۔ گرفتار دہشتگرداں دے خلاف 10مقدمے درج کرتے انہاں دی مزید تفتیش کیتی ویندی پئی اے۔ انہاں آکھیے اڄوکے ہفتے مقامی پولیس اتے سکیورٹی اداریں دے تعاون نال 758کومبنگ آپریشنز وی کیتے ڳئے جیں دے تحت 30ہزار394 لوکاں کوں چیک کیتا ڳیا ، 107 مشتبہ لوکاں کوں گرفتار کیتا ڳئے ، 102ایف آئی آرز درج کیتیاں ڳئن تے 70بازیابیاں تھئن ۔انہاں آکھیے سی ٹی ڈی پنجاب تکڑے طریقے نال محفوظ پنجاب دے اپݨے ہدف تے عمل کریندا پئے تے دہشتگرداں تے ریاست دشمن عناصر کوں سلاخاں دے پیچھوں پڄاوݨ دیاں کوششاں اچ کوئی کسر نہ چھوڑیسی انہاں آکھیے کہیں وی مشکوک سرگرمی دی اطلاع ہیلپ لائن تے کال کر تے ݙتی ونڄ سڳدی اے۔