اڄ پی ٹی آئی ݙاہ حصین اچ ونڈیج ڳئی اے ، 9 مئی آلیں ملکی دفاعی اداریں تے حملے کیتن تے 28 مئی آلیں ملکی دفاع ناقابل تسخیر بݨایا ، پاکستان بچاوݨ آلیں تے پاکستان برباد کرݨ آلیں وچال فرق ہمیشہ رہسی ، عطاءاللہ تارڑ

گکھڑ (گوجرانوالہ)۔8مارچ(اے پی پی) وفاقی وزیر اطلاعات و نشریات عطاءاللہ تارڑ آکھیے بانی پی ٹی آئی نفرت دی سیاست توں قوم دی ونڈ دی کوشش کیتی اڄ انہاں دی جماعت خود ونڈیج ڳئی اے ، 9 مئی آلیں ایں ملک دے دفاعی اداریں تے حملے کیتے تے 28 مئی آلیں ایں ملک دے دفاع کوں ناقابل تسخیر بݨائے، پاکستان بچاوݨ آلیں تے پاکستان برباد کرݨ آلیں وچال فرق ہمیشہ رہسی ۔ مختلف ترقیاتی منصوبیں دے افتتاح دے موقع تے عوامی اجتماع توں خطاب اچ وفاقی وزیر اطلاعات آکھیے مسلم لیگ (ن) ہمیشہ ملک کوں بحراناں توں کڈھیے ، عوام ہمیشہ مسلم لیگ (ن) دی آواز تے لبیک آکھیے، گکھڑ دے لوکاں کوں  خراج تحسین پیش کرینداں ، اتھاں دے عوام ہمیشہ مسلم لیگ (ن) دا ساتھ ݙتا۔ وفاقی وزیر آکھیے ھک سال پہل ایں ملک اچ شرطاں لڳدیاں پیاں ہن جو اے ملک ڈیفالٹ کر ویسی ، کجھ بدبخت ڈیفالٹ دیاں دعائیں کریندے پئے ہن ۔ ھک پاسے پاکستان بچاوݨ آلے لوک ہن تے ݙوجھے پاسے پاکستان کوں برباد کرݨ آلے ہن ، پاکستان کوں برباد کرݨ آلیں آئی ایم ایف کوں خط لکھیے ، انھاں لوکاں آپݨے دور اچ ھک سلھ نی لاتی جݙاں جو ساݙے منصوبیں کوں وی برباد کیتا ،اڄ اللہ دا شکر اے پوری دنیا دے مالیاتی ادارے پاکستان دی معیشت کوں منیندے پئن پاکستان دے معاشی اشاریے اتلی سطح تے ہن ، مہانگ گھٹ تھیندی پئی اے ، شرح سود تلے ویندی پئی اے ، سٹاک مارکیٹ اُتے ویندی پئی اے ملک ڈیفالٹ توں استحکام آلے پاسے ٹردا پئے ۔ ھک پاسے 9 مئی آلے ہن ݙوجھے پاسے 28 مئی آلے ہن ، 9 مئی آلیں ایں ملک دے دفاعی اداریں تے حملے کیتے 28 مئی آلیں ایں ملک دے دفاع کوں ناقابل تسخیر بݨائے، اے فرق ہمیشہ رہسی ۔ انہاں آکھیے پی ٹی آئی ایجھی پارٹی اے جیں دے لیڈر 190 ملین پائونڈ دا غبن کیتے جیں دی پوری دنیا اچ ہیڈ لائنز لڳن۔ بانی پی ٹی آئی ایں ملک دے خلاف سازشاں کیتن ، محب وطن پارٹی دے سربراہ محمد نواز شریف دے خلاف سازش کیتی، نواز شریف ایں ملک اچ موٹروے دا ڄال وچھائے ، لوڈ شیڈنگ مُکائی ، او جدید پاکستان دے معمار ہن، محمد نواز شریف ایں ملک کوں اُتے گھن ڳئے ، وزیراعلی پنجاب مریم نواز پورے پنجاب اچ تعمیر و ترقی دا انقلاب برپا کرݙتے۔ ۔ وفاقی وزیر اطلاعات آکھیے بانی پی ٹی آئی اڄ جیل اچ سہولتاں منڳدے پئن ۔ انہاں قوم دے ٻالاں دے ذہناں کوں زہر آلود کیتے، ہݨ سوشل میڈیا دا بخار وی لہہ ڳئے انہاں دے پلے کجھ نی رہیا ۔ انہاں خانداناں، دوستاں کوں بھڑوائے ، لوکاں کوں نفرت تے اکسائے، اڄ انہاں دی پارٹی ݙاہ حصے اچ ونڈیج ڳئی اے ، قوم دی ونڈ کرݨ آلیں دی اڄ آپݨی پارٹی دی ونڈ تھی ڳئی اے ۔ انہاں  بدنیتی نال اقتدار تے پیسے دی ہوس دی سیاست کیتی۔انہاں آکھیے سیاست خدمت دا ناں اے ، نفرت، ونڈ ، لٹ مار اتے کرپشن دی سیاست کرݨ آلے اڄ بے معنی تھیندے پئن انہاں دا کوئی ناں وی نی گھندا ۔ اے پاک فوج تے الزام لیندے ہن اساکوں افواج پاکستان تے ماݨ اے جیں دے جوان ، سپاہی اتے افسر روز ایں ملک دی سالمیت دی خاطر جاناں دیاں قربانیاں ݙیندے پئن ۔ وزیر اطلاعات عطاءاللہ تارڑ آکھیے پی ٹی آئی ملک برباد کیتے، نفرت دے بج رادھن ، فوج دے خلاف بیانیے بݨائے، ملک اچ انتشار کھنڈائے، دہشت گرداں کوں واپس گھن آئے اڄ انہاں دے آپݨے صوبے اچ صوابی دے جلسے اچ انہاں دے بندے پورے نی تھیندے پئے ۔ مریم نواز شریف نارروال ویندن تاں حد نگاہ لوک ہی لوک ہوندن ، میاں شہباز شریف ڈیرہ غازی خان ویندن تاں اتھاں میلاں تے لائناں لڳیاں پئن کوڑ تے منافقت دی سیاست ہݨ دفن تھی چکی اے  عطاءاللہ تارڑ آکھیے اساں ایں علاقے دا قرض لہاوݨ آیوں تساکوں حلقے اچ کوئی ایجھی جاہ نہ ملسی جتھاں ترقیاتی کم نہ تھیندے پئے ہوون ۔ علاقے دے عوام اساں تے اعتماد کیتے جیڑھا پیار تے محبت ݙتی ساݙا فرض بݨدے جو علاقے دی خدمت کروں ایں سانڳے پیر کوٹ توں شروع تھیوݨ آلی اٹھ کلو میٹر سڑک تے کم شروع کیتا ویندا پئے آندے سالاں اچ ایں حلقے اچ ترقیاتی کماں دے ڄال وچھیسوں