وزیرِاعظم دا پاکستان تے ازبکستان وچال تجارتی حجم 2 ارب ڈالر تئیں ودھاوݨ سانڳے روڈ میپ تیار کرݨ دی لوڑھ تے زور

اسلام آباد۔13مارچ(اے پی پی) وزیرِاعظم محمد شہباز شریف  پاکستان تے ازبکستان وچال تجارتی حجم 2 ارب ڈالر تئیں ودھاوݨ سانڳے روڈ میپ تیار کرݨ دی لوڑھ تے زور ݙتے ۔ وزیراعظم دفتر دے میڈیاونگ توں جاری بیان موجب وزیراعظم محمد شہباز شریف نال ازبکستان دے سفیر علی شیر تختائف  وزیراعظم ہاؤس اچ ملاقات کیتی ۔ وزیراعظم ازبک سفیر دے ذریعے صدر ازبکستان شوکت مرزیوف سانڳے نیک خواہشات دا اظہار کیتے تے گزریل مہینے تاشقند دورے دے دوران انھاں تے پاکستانی وفد دی مہمان نوازی سانڳے دلوں شکریہ ادا کیتے ۔ وزیراعظم اپݨے دورے دے دوران ݙوہیں ملکاں وچال ݙوپاسے تعلقات تے تھیوݨ آلی پیشرفت تے اطمینان دا اظہار کیتے جئیں اچ اعلیٰ سطحی اسٹریٹجک تعاون کونسل دی تشکیل دے نال نال مختلف شعبیں اچ ٻہوں سارے اہم معاہدیں تے مفاہمتی یاداشتاں تے دستخط وی شامل ہن ۔ وزیراعظم آکھیے تاشقند توں واپسی تے انہاں متعلقہ شعبیں دے وزراکوں ذمہ داری ݙتی اے جو او دورے دے دوران تھیوݨ آلے فیصلیں تے وختی عمل درآمد یقینی بݨاون ۔ انہاں خاص طور تے کان کنی اتے معدنیات، ریلوے (بشمول ٹرانس افغان ریلوے پروجیکٹ)،خصوصی اقتصادی زونز، بینکنگ، سیاحت، ثقافت اتے قابل تجدید توانائی اچ ازبکستان نال تعاون ودھاوݨ اچ پاکستان دی دلچسپی تے روشنی پاتی۔ وزیراعظم ݙو طرفہ تجارت کوں 2 بلین ڈالر تئیں ودھاوݨ تے کم کرݨ سانڳے ھک روڈ میپ وضع کرݨ دی لوڑھ تے زور ݙتے ، جئیں دورے دے دوران ݙوہیں رہنماواں وچال اتفاق کیتا ڳیا ہئی ۔ ازبک سفیر وزیراعظم دی نیک خواہشات  تے شکریہ ادا کیتے تے آکھیے صدر شوکت مرزیوف پاکستان نال ازبکستان دے تعلقات کوں تکڑا بݨاوݨ تے ݙوہیں ملکاں وچال بہترین سیاسی تعلقات کوں سانجھے طور تے مفید اقتصادی تعلقات اچ بدالݨ سانڳے پرعزم ہیسے ۔ انہاں اے وی ݙسائے صدر مرزیوف اڄوکے سال دے چھیکڑ اچ پاکستان دا سرکاری دورہ کرݨ دی وزیراعظم دی دعوت قبول کرڳھدی اے ، جئیں سانڳے تاریخان دے تعین تے فریقین وچال ڳالھ مہاڑ جاری اے۔