ٹریک دی بحالی مکمل ، کل توں بلوچستان ریل گاݙی آپریشن ول شروع تھیسی ، حساس علاقیں اچ ریل گاݙی دی ڈرون دے زریعے نگرانی  کیتی ویسی ، وزیر ریلوے حنیف عباسی

اسلام آباد۔17مارچ(اے پی پی) وفاقی وزیر ریلوے محمد حنیف عباسی آکھیے جعفر ایکسپریس حملے دے بعد ٹریک دی بحالی مکمل ، کل توں پاکستان ریلوے دا آپریشن شروع  کرݙتا ویسی ، بلوچستان اچ ریل گاݙی دی ڈرون دے ذریعے نگرانی  کیتی ویسی ، پورے ملک دے ریلوے سٹیشنز تے حساس جہیں تے سی سی ٹی وی کیمرے لاوݨ دا فیصلہ کیتا ڳئے ، غیر ملکی امداد تے  پھلݨ آلی پی ٹی آئی بھارتی  پروپیگنڈے  کوں سوشل میڈیا دے ذریعے اڳوں ودھیندے ہوئیں نظر آئی ، ریلوے ملازمین دی پنشن اچ کجھ اوکھ ہن او وختی مکا گھنسوں ۔ او پارلیمنٹ ہاؤس دے ٻاہروں میڈیا نال ڳالھ مہاڑ کریندے پئے ہن وفاقی وزیر ریلوے محمد حنیف عباسی آکھیے جعفر ایکسپریس دا اندوہناک واقعہ پیش آئے ایں واقعہ متعلق قوم کوں ݙسیندے رہیوں ۔ ایں واقعہ اچ پاکستان ریلوے  تے ریلوے پولیس دے 2 ملازمین شہید تھئن جنہاں دے پاکستان ریلوے دی طرفوں فی کس ݙو ،ݙو لکھ روپے مالی امداد ݙتی ویسی ، جعفر ایکسپریس حملے دے بعد پاکستان سکیورٹی فورسز جئیں پیشہ وارانہ مہارت نال آپریشن کر تے یرغمالیاں کوں بچائے ایندی دنیا اچ مثال نی ملدی ۔ ھکی جاہ تے 9 خودکش حملہ آوراں دی موجودگیاچ ھک جانی ضیان وی تھئے بغیر سارے مسافراں کوں چھڑوایا ڳئے ۔ ھک سوال تے انہاں آکھیے ایں واقعہ اچ ٹریک کوں ٻہوں ضیان پڄے جیویں ہی سکیورٹی  فورسز کلیئرنس ݙتی ایندے نال ہی پاکستان ریلوے دے مزدوراں ٹریک بحالی سانڳے ݙینھ رات کم کیتے ہݨ ٹریک بحال تھی ڳئے جیں دے بعد کل تں باقاعدہ کوئٹہ ریل گاݙی سروس ول شروع تھی ویسی ۔ انہاں آکھیے ایں  واقعہ اچ جتنے وی مسافر شہید تھئن او سکیورٹی فورسز دے اُتھاں پڄݨ توں پہلے دہشت گرداں دی فائرنگ ت شہید تھی چکئے ہن ۔ سکیورٹی فورسز دے آپریشن دے دوران ھک شہری دی شہادت وی نی تھئی بلکہ حملہ آور 33 لوکاں کوں جہنم واصل کیتا ڳئے ساݙا دشمن چاہندے جو ملک عدم استحکام دا شکار تھیوے ایں سانڳے او کوششاں وی کریندا رہ ویندے