وزیراعظم محمد شہبازشریف دی صدارت اچ وزارت قومی غذائی تحفظ و تحقیق دے امور تے جائزہ اجلاس

اسلام آباد۔17مارچ  (اے پی پی):وزیراعظم محمد شہباز شریف غیر معیاری زرعی بج دا کاروبار کرݨ آلی کمپنیاں دے خلاف وختی  سخت کارروائی یقینی بݨاوݨ،پاکستان اچ خوردنی تیل دی پیداوار دے حوالے نال اقدامات تکھے کرݨ تے صوبائی حکومتاں ، نجی شعبے اتے ٻئے سٹیک ہولڈرز نال رل تے ملک اچ فارم میکانائزیشن کوں ودھارا ݙیوݨ دی ہدایت ݙتن ۔وزیراعظم دفتر دے میڈیا ونگ توں جاری بیان موجب وزیراعظم محمد شہبازشریف دی زیرصدارت وزارت قومی غذائی تحفظ و تحقیق دے امور تے جائزہ اجلاس تھئے۔ وزیراعظم آکھیے زراعت ملکی معیشت اچ ریڑھ دی ہݙی دی حیثیت رکھیندی اے ،حکومت ملک اچ زرعی شعبے دی ترقی اتے زرعی پیداوار ودھاوݨ دے حوالے نال ساریاں سہولتاں ݙیسی ،زرعی شعبے دی ترقی سانڳے پورے ملک توں نوجوان زرعی محققین دی خدمات ڳھدیاں ویسن وزیراعظم ہدایت کیتی جو غیر معیاری زرعی بج دا کاروبار کرݨ آلیاں کمپنیاں دے خلاف وختی سخت کاروائی یقینی بݨائی ونڄے ۔وزیراعظم پاکستان اچ خوردنی تیل دی پیداوار دے حوالے نال اقدامات تکھے کرݨ دی ہدایت کیتی تاں جو خوردنی تیل دی درآمد تے خرچ تھیوݨ آلا قیمتی زرمبادلہ بچایا ونڄ سڳے وزیراعظم ہدایت کیتی جو پی اے آر سی اچ تحقیقاتی کم کوں وختی فعال کیتا ویسی ،صوبائی حکومتاں، نجی شعبے اتے ٻئے سٹیک ہولڈرز نال رل تے پورے ملک اچ فارم میکانائزیشن کوں ودھارا ݙتا ونڄے ۔ وزیراعظم اے وی ہدایت کیتی جو پھل تے سبزیاں دی پیداوار دے حوالے نال ویلیو ایڈیشن سانڳے نینگراں دی تربیت تے انہاں کوں سوکھے زرعی قرضے ݙیوݨ دے حوالے نال اقدامات چاتے ونڄن۔وزیراعظم پاسکو کوں ختم کرݨ دے حوالے نال سارے ضروری امور وختی نبیڑݨ دی ہدایت کیتی ۔وزیراعظم زرعی اجناس دی برآمدات دے حوالے نال کھیت توں گھن تے پورٹ تئیں پوری سپلائی چین کوں ڈیجیٹائز کرݨ دی حکمت عملی تیار کرݨ تے اظہار اطمینان کیتے۔اجلاس کوں زرعی برآمدات ودھاوݨ دے حوالے نال حکمت عملی تے بریفنگ ݙتی ڳئی ۔بریفنگ اچ ݙسایا ڳئے نیشنل ایگری ٹریڈ اینڈ فوڈ سیفٹی اتھارٹی دا قیام حتمی مرحلے وچ اے ، زرعی اجناس دی ٹیسٹنگ دے حوالے نال یورپی یونین اتے بین الاقوامی معیار نال ہم آہنگ لیبارٹری  یونیورسٹی آف کراچی دے ایچ ای جے سینٹر اچ بݨائی ڳئی اے بریفنگ اچ ݙسایا ڳئے زرعی شعبے اچ وفاق اتے صوبیں وچال ہم آہنگی ودھاوݨ سانڳے نیشنل منسٹیریل فورم آن ایگریکلچر تشکیل ݙتا ڳئے ،بیج، ایگریکلچر بائیو ٹیکنالوجی اتے آرگینک فوڈ دے حوالے نال قومی پالیساں دے مسودے منظوری دے مختلف مرحلے وچ ہن  اجلاس اچ وفاقی وزیر قومی غذائی تحفظ و تحقیق رانا تنویر حسین، وفاقی وزیر اقتصادی امور احد خان چیمہ، وفاقی وزیر خزانہ و محصولات محمد اورنگزیب ، وزیراعظم دے مشیر ڈاکٹر توقیر شاہ، گورنر سٹیٹ بینک جمیل احمد ، چیئر مین فیڈرل بورڈ آف ریونیو راشد لنگڑیال اتے متعلقہ اعلیٰ سرکاری افسراں شرکت کیتی